French Open champion tur hriatthiam harsa : Carlos Alcaraz hmabak chu Jannik Sinner

Tsnnis player chhuak thar zinga theihna nei sang leh ṭhang duang Carlos Alcaraz leh Jannik Sinner te an inhmachhawn dawn. Player pahnih hian French Open semifinal an lut a, final luh inchuhin Zirtawpni zanah an intawng zui leh nghal dawn a ni.

French Open quarterfinal hmuhnawmah, seeded pathumna Alcaraz hian darkar hnih leh minute 15 chhung lekin Stefanos Tsitsipas chu 6-3, 7-6(3), 6-4 in a hneh a, a kum zawnin Roland Garros semifinal a khel dawn.

Inkhel dangah Jannik Sinner pawh a chak - Australian Open champion lai hian Grigor Dimitrov chu 6-2, 6-4, 7-6(3) in a hneh ve thung a, tournament zawh ruala world number 1 ni mai tur hian a ranking thar lawm nan nomawi chawi a chak zual hle ang.

Alcaraz a chungnung

French Open 2023 quarterfinal-ah khan Alcaraz hian Tsitsipas hi a lo hneh tawh a, kuminah pawh an intawnna round ngaiah bawk intawng lehin harsatna a nei lem lo; Greek tlangval nen a pumpuia vawi ruk an inkhelh tawhah a chak vek.

Grand Slam vawi hnih champion tawh hian a tir lamah a khingpui service a chhuhsak nghal a, inkhel pumpui thlirin a chungnung tluang chhuak zak. Amah elphak tura ngaih lakah harsatna a tawk lo a, a dam ṭha a nih chuan a hlauhawm chhunzawm ang.

Alcaraz chuan, "Chiai miah loa inkhelh hi a harsa a, tun ṭum match kan khelh zawh takah kha chuan chu chu ka ti thei - tun season French Open ka khelh tawh chinah chuan ka lawm hle, ka hmabak erawh a hautak dawn tih ka chiang hle.

"Tunlai khawvelah chuan Sinner hi player ṭha ber a ni a, a inkhel lai te hi hmuhnawm ti takin ka lo thlir ṭhin. Ka tan chuan chona lian leh harsa tak a ni dawn, ani hian player ṭha leh hriam zawkah min chherchhuah ngei pawh ka beisei," a ti.

Hmabak Sinner

Alcaraz leh Tsitsipas te inkhelh hmain Sinner chuan Grigor Dimitrov a hneh fel tawh a, world number 1 ni lai Novak Djokovic a inhnuhdawh avangin world ranking chhuak tharah a chung ber luahtu a ni dawn tih a chiang bawk, atan lawmna tur hlir a ni.

Italian tlangval hi world number 1 a ni dawn tih a chian thu hi puan a ni a; Court Philippe-Chatrier-a inkhel entute chuan zahna chibai an buk. Sinner chuan, "Novak Djokovic inkhel thei lo hi a pawi ka ti a, dam leh thuai turin ka duhsak.

"Player tin hian world number 1 nih kan duh vek a, kan duhthusam pawh a ni. Kei leh ka team tan chuan hun nuam leh lawmawm a ni a, match lehpekah pawh result ṭha ka neih theih phah ka beisei," tiin a lungawi thu a sawi.

Semifinal thlir lawk zuiin Sinner chuan, "French Open ka khelh tawh chinah kumin hi ka thlen san ber a la ni, season dangah chuan result ṭha neih hi a harsa ka ti ṭhin, kuminah chuan tawp mai loin ṭha taka a hmawr bawk ka tum ang," a ti.