French Open champion tur hriatthiam harsa : Swiatek-i dang thei an awm lo

A tirah khan chuan Iga Swiatek theihna ringhleltu an tam ṭhin, tunah erawh Serena Williams chawlh hnuah chuan Polish nula hi hmeichhe tennis thunun rei thei ber a ni tih chu phat theih a ni tawh lo.

World number 1 Swiatek hian Marketa Vondrousova chu darkar khat leh minute hnih chhung lekin 6-0, 6-2 in a hneh a, a match hmasa lamah game khat mah hloh loin hnehna a lo chang tawh bawk.

Roland Garros bikah Swiatek hi a zawnin match 19 a chak tling ta a, tun season French Open a match hmasa lamah Naomi Osaka lakah talbuai ve deuh mah se tunah chuan nghet ṭha leh tawh hle.

Kum 23 mi Swiatek chuan, "Match hmasa ai khan ka service a ṭha zawk hialin ka hria, tun hnai ka match hnuhnung pahnihah chuan harsatna engmah ka nei lo," tiin inkhelh nuam a tih thu a sawi.

Swiatek hian a match lehpek atan chuan zanin hian Coco Gauff a hmachhawn dawn, quarterfinal inkhel dangah Gauff hian Tunisian star Ons Jabeur chu 4-6, 6-2, 6-3 in a lo hneh ve thung, set hloh hmasa mah se huaisen takin a tho chhuak.

Semifinal chungchang sawiin Swiatek chuan, "Coco hi player ṭha tak a ni a, a bik takin French Open a khel ṭha thei lo, chutihrualin keimah khelh dan chauh ka ngaihtuah dawn, chumi tur chuan rilru ka sawrbing," a ti.

French Open 2023 final-ah khan Swiatek leh Gauff te hi an lo intawng tawh a, tawnhriat nei ṭha Swiatek a chak. Season khat hnuah an intawng leh dawn, an intawn inkarah Amercian nula hian tawnhriat tam tak a lo nei ve hman.

US Open champion lai Gauff chuan, "Player ṭha leh hautak tak tak ka lo hmachhawn tawh ṭhin, chung zingah chuan tun ṭuma ka khingpui Ons Jabeur pawh hi a tel, ani ka hneh hian inrintawkna tam tak min siamsak," a ti.