Djokovic a inhnukdawk

French Open champion lai a ni a, nomawi humhim tumin theihtawp chhuah mah se Novak Djokovic chu a khup hliam vangin a inkhel chhunzawm ve thei dawn tawh lo, quarterfinal khelh hmain a inhnukdawk.

Serbian star hian last 16 match hautak takah Francisco Cerúndolo chu harsa takin a hneh a, he inkhelah hian hliam vanga enkawl lailawk te pawh a ngai hial. Hnehna chang hram mah se Casper Ruud erawh a hmachhawn thei dawn lo.

Tun season kal laiah Djokovic a khel ṭha tawk lo, tournament a khelh hoah final luh a la nei miah lo. World number 1 ni zui turin French Open final a luh ngei a ngai, tunah chuan a nomawi leh number 1 nihna a hloh dawn ta a ni.

Kum 37 mi Djokovic chuan, "Inhnukdawk tura thutlukna siam chu harsa ka ti hle, mahse hun lo kal leh tur ngaihtuah chungin ka tan a ngai ta si," a ti a, a vawi 25 nana Grand Slam nomawi la tur chuan Wimbledon a nghah leh rih a ngai ang.

Clay court season an hmang zo hnai - tun thla tawp aṭangin grass court season an hmang chhunzawm nghal ang. Wimbledon khelh hun a hnai a, hei bakah hian Paris Olympic a awm dawn bawk, tunah chuan Djokovic dinhmun hi a chiang ta rih lo a ni.