De Bruyne hma hun a chiang lo

Manchester City midfielder Kevin de Bruyne chuan a hma hun a chiang lo tih a sawi a, sum tamna Saudi Arabia lam a pan daih a nih pawhin a mak hran lo ang.

Belgium international De Bruyne hi kum 32 mi a ni tawh a, a vanglai a liam ve mek. Man City tan tun dinhmunah kum khat daih contract a la nei mek a, a hmang zo ngei dawn tih a sawi chiang ngam lo a ni.

Man City tana Premier League nomawi paruk leh Champions League pakhat la tawhtu KDB-a chuan, "Etihad Stadium-ah kum khat daih contract ka la nei, eng nge thleng dawn tih chu ngun takin ka ngaihtuah ang.

"Ka fa upa ber hi kum riat mi a ni tawh a, England lo chu khawvel hmun dang hriat a nei lem lo, engtik thleng nge Man City tan ka khelh dawn tih te hi min zawt ṭhin, engtik niah emaw chuan khawvel hran a la tem ve a ngai dawn.

"Ka kum angah chuan hma hun hi ngaihtuah uluk lehzual a ngai hle, sawmna duhawm leh ṭha tawk tak kan dawng a nih chuan, nakina kan hun lo awm leh zel tur ngaihtuah chunga thil tih a ngaihna chen pawh a awm ang.

"A nihna takah chuan Saudi Arabia ramah kum hnih chhung inkhel ta ila, sum tam leh hlawk lutuk tak mai ka hlawh thei dawn a ni," tiin a sawi a, sum hlawh tam theihna lam pan a hreh dawn lo niin a rin theih.

Belgium captain hi season hmasa khan hliam vangin a chawl rei hle a, thla nga deuh thaw a inkhelh theih loh avangin Man City tan inelna hrang hrangah match 26 chauh a khel, a inlan tam lo chungin a zawna a vawi li nan EPL champion an ni ta tho.

Tunah chuan De Bruyne hi Belgium tana Euro 2024 khel turin a inbuatsaih mek a, an ram tan pawh inelna lian a inlan hnuhnung lam a ni tawh ang.