PSG-ah khan ka hlim lo - Mbappe

Kylian Mbappe chuan a chhuahsan tak Paris Saint Germain-ah khan hlimna tam tak tawng mah se, a hun tawp lamah erawh a hlim lo tih a sawi chhuak.

France captain hian PSG tana a contarct hmang zoin Real Madrid a zawm a, tunah an ram France tan training mek mah se a club hlui leh thar chungchangah zawhna a dawng reng.

Kum 25 mi Mbappe chuan, "PSG-ah khan ka hlim lo, min thlawpa min ṭan em em ṭhintute ngei khan harsatna leh lawm lohna tam tak min siamsak thung. Hruaitu zinga mi ka ni a, ka lungawi lohna tih lan erawh a remchang ṭhin lo," a ti.

PSG coach Luis Enrique leh adviser Luis Campos te chungchang sawiin Mbappe chuan, "Anni pahnih khan min chhan tlat a, awm lo se la chuan Paris club tan khan ka chhuah tur thu ka sawi hnuah khan match ka khel tawh lo hial ang.

"Ka tan season ṭha ber a ni lo a, khelmual chhung leh pawnah harsatna hrang hrang ka tawng ve bawk. Chutiang karah chuan nomawi kan chawi a, hlawhtlinna kan chan tho avangin ka lawm," tiin a sawi.