Euro 2024 : Inkhel en châkawm paruk

Euro 2024 chu June 14, Zirtawpni aṭangin Germany-ah khelh ṭan a ni dawn. Inelnaah hian team 24 an awm a, group stage-ah match 36 a awm dawn. Chung zingah chuan en châkawm zual paruk han thur chhuak ta ila.

Opening match

June 14, Zirtawpni zan dar 12:30 hian Germany leh Scotland ten Allianz Arena, Munich-ah opening match an khel dawn. Inkhel ropui ber chu a ni hauh dawn lo a, mahse match hmasa ber a nih bakah vawi thum champion tawh Germany tan fiahna a ni dawn.

Julian Nagelsmann hote tan Scotland hi a awlsam dawn lo. Scotland hi qualifying-ah Spain, Norway leh Georgia te nen group khata an awm chungin vawi khat chiah an tlawm. Erling Haaland leh Martin Odegaard ten Euro 2024 an khelh lohna chhan an ni a, a chhan chu Scotland hian inkhel pawimawhah Norway an hneh tlat. Scotland hian Germany hian competive match vawi riat an hmachhawn tawhah hneh la nei lo mah se Munich-ah engpawh thleng thei a ni.

Spain vs Italy

June 20, Ningani zan dar 12:30-ah Spain leh Italy te an inkhel dawn a, Europe ram lian pahnih hi group khatah an awm tlat avangin group stage-ah inkhel en châkawm bik hmuh tur a awm phah. Italy hi champion lai ni mah se World Cup hnuhnung berah khan an tel pha lo.

Spain-in Euro C'ship nomawi an chawi hnuhnung ber chu kum 2012 kha a ni a, final-ah Italy 4-0 in an hneh. Rodri, Pedri leh hmabak nei êng Lamine Yamal te awmna team Spain hi tawh an khirh dawn. Chutihrualin Italy hian pressure sang an ngam ṭhin. Coach thar Luciano Spalletti-a tan hming chherna remchang a ni dawn.

Euro semifinal rematch

Euro 2020 semifinal-ah khan England-in Denmark chu extra time-ah 2-1 in an hneh. Tun ṭumah hian group khatah an awm ho a; June 20, Ningani zan dar 9:30-ah an inhmachhawn dawn. Team ṭha pahnih hi qualifying round-ah an group-ah pakhatna an ni ve ve.

Denmark coach Kasper Hjulmand-a'n player 26 a kohah an ram league-a mi an awm miah lo. Chutihrualin England, Spain, Germany, Italy, Belgium leh Turkey-a khelte an nih hlawm avangin dah hniam an har a, tlarhma lamah Ramus Hojlund an neih belh a, player an nei chhe lo. England erawh tun hnaia an ṭhat ber ṭum a ni hial ang. Gareth Southgate-a hote hi champion tur hiala rin an ni pha.

Netherlands vs France

Kum 1988 champion Netherlands-in kum 1984 leh 2000 champion France an hmachhawn dawn. June 21, Zirtawpni zan dar 12:30-ah an inkhel dawn a, zanlaia inkhel tur ni mah se men rei pui tham inkhel a ni hrim hrim.

Oranje hian kum 2004 hnu lamah Euro C'shp-ah semifinal an thleng pha tawh lo. Tun ṭumah hian Virgil van Dijk, Xavi Simons leh Cody Gakpo te an kawl a, semifinal chauh ni loin final hial thleng pha thei tur an ni.

Chutihrualin Kylian Mbappe telna France erawh all star team ang hiala chhal theih an ni a, Didier Deschamps hote hian qualifying round-ah Oranje hi ṭum hnih ngawt an hneh bawk.

Belgium vs Romania

Inelna lianah Belgium an champion ngai lo a, golden generation-a sawite meuh pawh khan Euro C'ship-ah quarterfinal an kal pel lo. Tun ṭumah hian goalkeeper Thibaut Courtois koh a ni lo a, Kevin de Bruyne te pawhin Man City tana an khelh danah an kum a upa ve tawh tih a lang.

Mahse, Romelu Lukaku-a'n qualifying round-ah record thar siamin goal 14 a khung. Manager Domenico Tedesco-a'n Lukaku bakah Jeremy Doku, Leandro Trossard leh Charles De Ketelaere te a nei a, an squad a la ṭha hle.

Romania erawh Euro 2020 hnua an vawi khat rawn khelhna lehna a ni a, chutihrualin inelna an hmachhawn hnuhnun ber khan England, Germany leh Portugal te nen group khatah an awmin an paltlang tih hriat a ṭha.

Turkey Vs Portugal

Euro C'ship-ah mipa football history-a ram tana goal khung tam ber Cristiano Ronaldo a la tel dawn a, hei vang hian Portugal inkhel pathum zinga pakhat tal chu en châkawm zinga dah a ṭul.

Roberto Martínez kaihhruai Portugal hian Turkey hi Euro C'ship-ah vawi thum hmachhawn tawhin an hneh vek. June 22, Inrinni zan dar 9:30-a an inkhelh hunah pawh Portugal hi chak tur zawk rin an ni a, chutihrualin Vincenzo Montella hote hian Ronaldo leh a ṭhiante tan harsatna an siam thei ang.