Portugal tan Bruno Fernandes

Euro 2024 khel tur inpuahchahna friendly match-ah Portugal chuan 4-2 in Finland an hneh a, Manchester United captain Bruno Fernandes-a'n goal hnih a khung.

Estadio Jose Alvalade, Lisbon-a inkhelah Cristiano Ronaldo a tel lo. Ruben Diaz-a'n minute 17-naah corner kick aṭanga ball kal chu a tauh lut. Kum 26 mi Francisco Conceicao a hmuhnawm a, squad ti kimtu chauh ni loin inelna takah pawh minute a neih a rinawm hial. Conceicao hian penalty a hawh chhuak a, Diogo Jota-a'n goal-ah a chantir.

Portugal-in inkhel an thunun a, an phu angin minute 55-naah Bruno Fernandes-a'n mawi zetin box pawn aṭangin a khung. Finland lamin Teemu Pukki an kawl a, an chance neih hmasak ber chu minute 72-naah khungin minute nga hnuah Pukki bawk hian ṭha zetin a khung leh bawk.

A tawpah erawh team ṭha zawk danglamna a lang a, Portugal tan Fernandes bawkin minute 84-naah khungin 4-2 in an chak. Fernandes goal pahnih hi Conceicao siamsak ve ve a ni.

Portugal hian June 8, Inrinni zan dar 10:15 hian Croatia nen friendly match an khel leh ang. Euro C'ship match hmasa bera Czech Republic an hmachhawn hmain June 11, Thawhlehni zan dar 12:15-ah Ireland an hmachhawn leh bawk ang.