City-in Premier League khing dawn

Manchester City chuan karleh lam hian Premier League chu 'commercial rules' chungchangah an khing dawn.

June 10-21, 2024 chhung hian Premier League dan hman mek Associated Party Transaction (APT) rules chu court hmaah sawi ho a ni ang. APT rules hi club sponsorship hmuh endikna atan a hman a ni.

February thla khan Premeir League hian an hnuaia club aṭangin ATP dan chungchangah vauna an tawh thu, London-a club shareholder ho inhmuh khawm ṭumin club 20-te an hriattir a, club vautu hming erawh an tarlang lo.

Premier League emaw Manchester City emawin hemi chungchangah hian thuchhuah siam an nei lo a, zawhna an chhang lo bawk. Chutihrualin British chanchinbu Times chuan City ṭanna phek 165-a chhah legal document an hmu niin an insawi.

Times tarlan danin City ṭan chhanah chuan Premier League club dang 19-ten khelmuala result ṭha an neih theih loh nan an inthu rual a, tamna chu remchangah lain dan an thlakah an gai.

Thla liam ta khan City chu English football history-a league title season zawna vawi li la thei hmasa ber an ni a, tun hnaia khelmuala an result neih ṭhat avangin an elpui club-te hi khelmual pawnah an inthurualah an ngai niin a lang.

Kumin kumtir khan sponsor chungchang dan hi thlak a ni a, PL danah hian dan thlak turin club 14 chin talin an pawmpui a ngai. Chutihrualin Premier League chuan dan thlak chhan hi ṭha zawka dan an hman theih nan a nih thu a sawi.

Times tarlan danin City hian dan thlak chungchanga Premier League an khin bakah dan thar avanga harsatna tawh avangin zângnadawmna an beisei bawk.