Barbados-ah ruahsurin inkhel tibuai

T20 Cricket World Cup-ah champion lai England-in match hmasa berah Scotland an hmachhawn a, ruahsur vangin result a awm thei lo. Inkhelh banah team pahnih hian ruahsur lo se, chak theih an inrin ve ve thu an sawi.

June 4, Thawhlehni inkhelah Scotland-in an bat hmasa a, opener pahnih George Munsey (41*) leh Michael Jones (45*) te an che ṭha a, over 10-ah 90 runs an siam. Ruahsur vangin over 20 chu over 10-ah tih tlem a ni a, England target pawh 109-ah a pung chho bawk.

England tan 109 hi target harsa a ni a, mahse ruahsur vangin an khelh chhunzawm thei ta lo. Inkhelh banah England coach Matthew Mott chuan, "Target hi sang angin lang mah se umphak hi thil theih a ni. Over 10 chauh ni mah se wicket 10 kan nei a, ball a huh bawk avangin kan dinhun a ṭha. Kan khel chhunzawm thei lo kha, pawi ka ti takzet," tiin a sawi.

Scotland pawhin dinhmun ṭha zawkah an inngai ve tho. Opener Michael Jones chuan, "Ruah kan hneh lo a ni. Bowler ṭha kan nei a, team ṭha tak kan nih avangin kan khel zo thei lo kha pawi kan ti. Inkhelh hma khan point insem thei ta ila, insem nghal mai kan duh hial ang. Mahse, khatiang dinhmuna kan din tak hnu kha chuan khelh zawh kan duh zawk," tiin a sawi.

Group B-ah hian Australia, England, Namibia, Scotland leh Oman te an awm a, England leh Scotland ten point an insem tak avangin Super 8 lut tur hriatthiam a har sawt dawn. Australia an la inlan ve loh avangin Oman hnehtu Namibia chu hmahruaitu an ni mek.

Tukin zing dar 6:00 hian Australia leh Oman te an inkhel dawn a, zanin dar 12:30-ah Namibia leh Scotland te an inkhel zui dawn. England hi June 8, Inrinni zan dar 10:30-ah an inlan leh chauh dawn a, an khingpui tur Australia a nih avangin vanduai chuan group stage paltlang lo ve thei an ni.