June 21-ah Charity Football Match - Mizo Players : ISL Vs I League

Mizoram Football Association chuan Mizo Professional Footballers Association (MPFA) te nen ṭangkawpin June 21, Zirtawpniah Cyclone remal avanga chhiattawkte ṭanpui nan RG Stadium-ah Charity football match an buatsaih dawn.

Charity football match-ah hian Mizo player ṭhate an inlar dawn a, season khelh zawh taka GIG ISL Player-te leh GIG I-league Player-te zan dar 7:30-ah an inkhel ang. ISL lamin India aiawha khel thei Lallianzuala Chhangte, Lalengmawia Ralte (Apuia) leh Lalchungnunga te an neih laiin I League player pawhin India squad-a tel pha Edmund Lalrindika leh David Lalhlansanga te an kawl tih hriat a ṭha - football class sang chhawpchhuah a ni ang.

Tlai dar 5:00 aṭangin en tur a awm ṭan dawn. Mizo footballer hranghlui te, professional footballer lo ni tawh te leh kawng hrang hranga Mizoram a star tling phate an inkhel ang.

Inkhel hnuhnung zawk ṭan hmain mit leh beng titlai turin zai leh lam thiamte an che dawn. MDC & Fit In, Lilac, Youngfella, Mary Dawngi, Sangtei Khuptong leh H.O.M. te an che ang.

Starting XI?

ISL leh I League khel player-te hi an hman kim vek thei ang em, tih a chiang lo a, an hman kim theih erawh chuan a hmunawm dawn. India rama football inelna sang ber ISL-ah Mizo player 27 vel zet an awm a, bul ṭan phak a harsa hial ang. Goal veng turin Lalthuammawia Ralte a awm a, a position chuh buai tur an awm lo. Lalbiakhlua Jongte-in Mohammedan SC a zawm avangin ISL-ah Mizo goalkeeper pakhat chauh a awm.

Tlarhnungah Laldinpuia Pachuau, Lalchungnunga, Hmingthanmawia Ralte, Ricky Lallawmawma, Jerry Lalrinzuala, Laldinliana Renthlei leh Lalliansanga Renthlei te an awm a, bul ṭan tur thlan thiam a har dawn. Midfield leh forward lam hi Mizo ṭhatna a ni a; Apuia, Jerry Mawihmingthanga leh K. Lalṭhathanga te inkawp chu en châkawm tak a ni a, Ayush Chhetri, Vanlalpeka Guite, Paul Ramfangzauva Fredy Chawngthansanga, Lalremtluanga Fanai, Lalchhanhima Sailo leh Mark Zothanpuia te ho an la awm bawk.

Goal nawr tur lamah Lianzuala a awm a, a tlan chakna ringawt pawh hi a hmuhnawm dawn. Ball thiam Isak Vanlalruatfela, Issac Vanmalsawma, Ramhlunchhunga leh Aron Vanlalrinchhana te ho che vel pawh en a châkawm. Chutihrualin ISL-ah hian Jeje Lalpekhlua a awm tawh loh avangin no. 9 ṭha tak an awm meuh lo a, a hmun ruak hnawh khat thei tur zinga mi Daniel Lalhlimpuia'n hma a sawn zel a ṭul thung.

I League an ṭha!

ISL-ah player langsar an tam a ni thei a, mah se I League-ah erawh Mizoramin team an thawh tlat. Aizawl FC an awm miau avangin I League team turte hi an ṭha dawn tih a hriat theih. Mizo club-ah hian I League khelh zawh taka Indian player zinga goal khung tam ber Lalrinzuala a awm.

Chutihrualin I League champion Mohammedan SC-in Mizo player paruk an kawl a; captain Zodingliana Ralte (Adinga) bakah David Lalhlansanga, Lalremsanga Fanai, Samuel Lalmuanpuia, Vanlalzuidika leh Lalbiakhlua Jongte te hi ṭhatpui tham an tling.

Inter Kashi lamin Edmund Lalrindika leh Lalruatthara te an nei a, tun dinhunah Edmund aia en châkawm an awm chuang lo. Real Kashmir lamin Jeremy Laldinpuia leh Lalramdinsanga Ralte te an kawl a, Sreenidi Deccan-in Brandon VL Remdika, Lalromawia, B. Lalnuntluanga leh R. Lalbiakliana te an nei. Rajasthan FC-in Mizo player ṭhahnem tak an kawl a, Churchill Brothers leh Delhi FC-ah te pawh Mizo an awm. Team enkawl tur tan squad thlan ringawt pawh a har ang.