India-in Ireland an sawp

T20 World Cup-ah champion rinkai zinga mi India-in an match hmasa berah Ireland chu wicket riatin an sawp a, an hmelma Pakistan hmachhawn turin an inpeih. India leh Pakistan te hi June 9, Pathianni zan dar 8:00-ah an inkhel dawn a, Shaheens hian nizan khan inelna thlengtu United States an hmachhawn a, result kan hre hman lo.

Nassau County International Cricket Stadium, New York-a inkhelah ṭhumvawra vannei India-in vawm hmasak an thlang. Ireland batter-te tan India bowler-te an ṭha mah mah. Hardik Pandya-a'n wicket thum lain 27 runs a pe a, Arshdeep Singh (35/2) leh Jasprit Bumrah (6/2) ten wicket hnih ve ve lain Ireland hian over 16-ah 96 runs siamin an thi vek.

India tan target harsa a ni lo a, batter chhuanvawr pahnih captain Rohit Sharma (52) leh Virat Kohli ten bul an rawn ṭan. Kohli-a'n run khat chauh siam mah se Pakistan lakah erawh rin hlawh ber a ni tho ang.

Rohit-a'n ball 37 lekah 52 runs a siam a, inhliam vangin a chhuak. India tana chanchin lawmawm chu Rohit hi a inhliam na lo a, Shaheens a hmachhawn thei ang. T20 specialist Suryakumar Yadav-a'n six runs nen a tawp khar tum mah se a vuak thui tawk loh avangin run hnih lek a siam. Rishabh Pant-a'n remchang rawn lain batting technique mawi zetin six run a vua a, India-in 12.2 overs lekah 97/2 siamin hnehna an chang.