Napoli coach thar Antonio Conte

Italian coach thawm ngah ve tak Antonio Conte-a'n club enkawl tur a nei ve leh ta a, Chelsea boss hlui hian Napoli chu kum thum chhung atan a enkawl dawn - a lakah beiseina a sang ang.

Kum 54 mi manager hian thla 16 a enkawl hnuah March 2023 khan Tottenham Hotspur chu inhriatthiam tawnnain a chhuahsan a, hemi hnuah hian club enkawl a nei leh tawh lawk lo - tunah Napoli an lo lang a, Serie A lamah Conte kan hmu leh dawn ta.

Conte chuan, "Napoli hi khawvel huap ang pawha club langsar an ni a, he club enkawl theia ka awm hi ka lawm hle," a ti a, Serie A club-in a chunga rinna an nghah avangin a lawm thu a sawi.

Beiseina

Conte chuan, "Thil pakhat tiam theih che u ka nei a, kan team leh he club a ṭhan zel theih nan hian ka theihna zawng zawng ka hlan ang. Kei leh ka staff te chu he club tan hian kan inpe pumhlum dawn a ni," a ti.

Italian coach hi football khawvelah a mikhual lo hle. Player a nih lai pawha Juventus tana khel ṭhin Conte hian a club hlui Juve hi 2011-2014 inkar kha enkawlin, season thum chhung a zawnin Serie A-ah a champion pui a, Supercoppa Italiana chu vawi hnih a chawi bawk.

International football-ah pawh Italy enkawl tawhin, Chelsea chu 2016-17 season khan Premier League-ah a champion pui a, a season hnihnaah FA Cup-ah an champion bawk. Inter Milan chu 2019-20 season khan Europa League final a luhpui a, kum 11 hnua a vawi khat nan 2021-ah khan Serie A champion a nihpui thei bawk a ni.

A harsa dawn

Napoli hian 2022-23 season khan Serie A nomawi chu kum 33 hnua a vawi khat nan an chawi a, mahse, season hman zawh takah khan 10-na an ni hram! Coach pathum an nei hman a, Rudi Garcia leh Walter Mazzarri te chu banin, Francesco Calzona chu February thla khan season tawp thleng atan coach-ah an ruat.

Season tharah intuai hriam tumin Conte an la lut a, a hlawh atan pawh an inseng huai hle. Italian media-te chuan Conte hian kum khatah euro maktaduai ruk a hlawh dawn niin an sawi a, Inter Milan boss Simone Inzaghi (€5.5mtd) khumin, Serie A-ah chuan coach hlawh hnem ber a ni dawn - pressure erawh a sang sawt ang.

Hetihrual hian Serie A lam hi Premier League-te nena khaikhin chuan sum a tam lutuk lo a, Conte hian Spurs a enkawl lai khan season khatah £15mtd lai a hlawh - Serie A coach hlawh hnem ber ni dawn mah se, Premier League lama a hlawh nen chuan a la inthlau hle.

Serie A chhehvel

Conte bakah Serie A-ah coach inthlak a awm nual. Fiorentina boss Vincenzo Italiano chuan a club enkawl lai chhuahsanin, Bologna a zawm a, Bologna hian season tharah Champions League an khel dawn.

Kum 46 mi Italiano hi Fiorentina-ah a vannei tawk lo. Season hmasa khan Coppa Italia leh Europa Conference League final-ah a team hi hruai thleng ve ve mah se, a chak lo zawkah an ṭang a, tun season-ah ECL final hruai thleng lehin, Olympiakos chu 1-0 in an ngam lo.

Bologna lamah result ropui zawk beiseiin a lut. Hetihlai hian Champions League-a Bologna hruai thlengtu Thiago Motta hma hun a la chiang lo a, season tawp ruala chhuak coach hian Juventus a enkawl a rinawm - Juve hian coach Massimiliano Allegri chu May thla khan banin, coach lailawk Paolo Montero chu season tawp thleng atan an ruai.