Chelsea-in loan-a Lukaku chhuahtir an phal lo

Premier League club insingsa mek Chelsea chuan, an striker Romelu Lukaku chu chhuahtir duh mah se, loan-a chhuahtir tumna an nei lo a, a ngheta hralhchhuah a nih theih nan loan-a hawh dilna reng reng chu hnar an tum.

Blues hian kum 2021 khan an striker hlui hi Inter Milan aṭangin an la let a, a man atan pound maktaduai 97.5 ngawt an inseng. Hei chauh a ni lo a, Belgium striker hi kar khatah £325,000 an hlawhtir bawk.

Mahse, beisei angin Lukaku hi London club-ah a che ṭha lo a, an lakluh season-ah hian match 44 khelin goal 15 chiah a khung. Season khat hnuah loan-in an chhuah a, Inter Milan leh AS Roma-ah loan-in, kum khat ve ve a khel.

Inter tan hian match 37-ah goal 14 a khung a, AS Roma tan match 47-ah goal 21 a khung thung. Chelsea chuan kum 31 mi striker manah hian £37mtd an beisei nia sawi a ni a, Roma chuan a ngheta lakluh duh mah se Chelsea chhiarna man zat hian an ngam lo.

AC Milan leh Napoli pawhin Lukaku hi duh mah se, Chelsea chhiarna man zata lei turin sum an nei lo nia sawi a ni a, Napoli hian coach thar atan Inter lama Lukaku lo kaihruai tawhtu Antonio Conte an lakluh avangin Belgian striker hi an ngaihven hle.

Serie A club hian Lukaku lakluhna turin Victor Osimhen chu Chelsea-ah kaltir pawh an hnial lo a, mahse, £100mtd aia tlawm lo tura ngaih Nigerian striker hi Blues hian an hnena khel turin an it hran lo niin an sawi!

Lukaku hi season hmasa nipui transfer lai khan Saudi Arabia nen sawizawm a ni a, Saudi club Al-Hilal dawrna chu Chelsea hian pawm hman hial mah se, amah Lukaku zawk hian middle east lama khelh duh loin a hnar a ni.