Maddison tan hmun a awm lo

Euro 2024 khel tura inbuatsaih mek England chuan an squad-ah James Maddison an telh dawn lo a, Tottenham Hotspur attacking midfielder hian a puanthuah telin Three Lions camp a chhuahsan.

Germany-a khelh tur Euro-ah hian squad tinah player 26 zel an awm thei a, England coach Gareth Southgate-a'n player 33 ko phawtin, player pasarih ngawt chhawk leh tur niin, Maddison bakah hian Liverpool midfielder Curtis Jones pawh chhawk a ni.

England hian Thawhṭanni zan khan Bosnia-Herzegovina chu friendly match-ah 3-0 in an sawp a, St James' Park-a inkhelah hian Maddison hi bench aṭangin lut mah se, Southgate-a mit a tlung zo ta lo - Curtis Jones phei chu a inlan lo hrim hrim!

Liverpool centre-back Jarell Quansah pawh koh zingah tel mah se, kum 21 mi defender pawh hi la paih leh tur zingah a tel a rinawm. Three Lions hian Inrinniah final squad an puang dawn a, Maddison leh Jones bakah player panga an la chhawk leh dawn tihna a ni.

Kum 27 mi Maddison hi World Cup 2022-ah khan England squad-ah a tel phak a, mahse, ram tana vawi sarih inlan tawh midfielder hi Qatar-ah khan a inlan lo.

Maddison hian nipui lai khan Leicester City chhuahsanin, Tottenham Hotspur chu pound maktaduai 40-in a zawm a, season bul ṭan ṭha viau mah se, hliamin a tihbuai avangin beisei angin season a hmang chhunzawm ta lo - inelna hrang hrangah match 30 khela goal li khungin, assist vawi kua a nei.

Beisei anga season a hman loh bakah, friendly match-ah a ti ṭha tawk lo a, final squad-ah a tel dawn ta lo. Hetihlai hian hliam vanga rei tak chawl, Manchester United left back Luke Shaw erawh squad-ah a la awm ve zel a, Nilaini khan training a zawm ve ṭan.

England hian Euro ṭan hmain friendly match vawi hnih an khel dawn a, match hmasa zawka Bosnia-Herzegovina an hmachhawn ṭum khan Liverpool right back Trent Alexander-Arnold chu midfield-ah chhawr niin goal a khung a, Cole Palmer (penalty) leh Harry Kane ten goal an khung bawk.

Zanin dar 12:15-ah Iceland nen an intawng ang a, June 15 aṭanga Euro khel ṭanin, an match hmasa berah Serbia an hmachhawn ang. Three Lions hi group C-ah awmin, Serbia bakah Denmark leh Slovenia an awmpui bawk.