Sabalanka hnehtu Andreeva

Tleirawl Mirra Andreeva-i hming hi lo chhinchhiah a fuh ang, hmeichhe tennis ngainatu te chuan a hming hi an la lam ri nawn foin a rinawm - Russian tleirawl hian Aryna Sabalenka hnehin French Open semifinal a lut.

Court Philippe Chatrier-ah seeded pahnihna Sabalenka hi rinkai leh buk rit zawk a ni a, tun season a hman dan en phai chuan chak chiang tura rinkai a ni, mahse kum 17 mi lek Andreeva hian 6-7(5), 6-4, 6-4 in a hneh.

Tun hnai kum 27 chhungin Andreeva hi French Open semifinal lut thei naupang ber a ni hial a, player tawnhriat ngah leh ṭha lakah set hloh hmasa chunga a tho chhuak leh thei hian fak a hlawh zual hle.

Andreeva chuan, "A nihna takah chuan point hnuhnung lamah phei kha chuan ka hrechiang tawh mang lo, match point ka hmuh te khan ka khingpui service chhuhsak ka ngai zawk emawni te ka ti rum rum.

"Inkhelh hmain coach nen ruahmanna fel tak kan siam a, a tir lamah duh angin ti thei lo mah ila beidawng loa ka tih tlat avangin set hnihna aṭangin a hlawhtlinna kan hmu," a ti.

Nizan khan Jasmine Paolini nen semifinal an khel zui leh nghal a, result erawh kan hre hman lo. Italian nula Paolini hi seeded 12-na chang phak a ni a, kum 28 mi ni tawhin tawnhriat nei ṭha zawk a ni bawk.

Quarterfinal inkhel dangah Jasmine Paolini hian Elena Rybakina chu 6-2, 4-6, 6-4 in a hneh ve bawk - French Open chauh ni loin Grand Slam inelna huangah semifinal a luh vawi khatna a ni a, dai ngai loh ram a dai mek a ni.

Wimbledon champion hlui Rybakina hi theihna nei sang leh inelna lian boruak ngam ṭhin kha a ni a, world number 1 Iga Swiatek elphak tura ngaih kha a ni. Mahse, a khelh fuh leh fuh loh kar a hla ṭhin lutuk a, a tawpah a tuar leh ṭhin.