Indian football transfer: Eng nge thleng?

Season kan thlah a, Euro leh Copa America khelh hun lai a nih avangin football ngainatuten heti lam hi an hawi ṭhup - hetihlai hian India pawhin nizan khan Kuwait nen World Cup qualifier an khel a, inkhel pawimawh a nih piah lamah Sunil Chhetri-a'n ram tana a match hnuhnung ber a khelh avangin Indian football ngainatute pawhin heti lam hi an hawi.

Hetiang boruak karah hian Indian football transfer thawm hriat tur a awm ve reng a, Indian Super League lamah pawh club-ten player an inthleng kual nasa hle - ISL nomawi chawitu Mumbai City pawhin player an chân nual a, an la lut nual bawk.

Mumbai City-in Brandon Fernandes an lakluh te, Odisha-in Roy Krishna an chelh te, player paruk ngawt an chhuah te chu langsar zual a ni a, Indian football bazar pawh a ri ve laih laih mai!

Hello Brandon

Indian player thiam ber pawl Brandon-a'n Mumbai a zawm a, season hmasa khan FC Goa tan league match 20 khela goal thum khungin, assist vawi li a nei a, ISL player langsar pawl a ni ve reng.

Mumbai hian an tlarhnunga player pawimawh, Spanish defender Tiri chu season khat dang an hnena khel turin contract an ziahpui bawk a, captain Rahul Bheke a chhuak thung.

Bheke hian Bengaluru a zawm dawn niin an sawi. Kum 33 mi Bheke hian ISL-ah match 150 zet a khel tawh a, season hman zawh takah khan Mumbai tan league match 23 khelin, player pawimawh a ni.

Krishna a cham dawn

Fiji captain Roy Krishna-a'n Odisha chhuahsan aiin khelh chhunzawm zel a thlang a, season khat dang cham turin contract thar a ziak. Kum 2019-a ATK zawm a, Indian football luhchilh ṭantu Krishna hi kum 36 ni tawh mah se, tlarhmaah a la hlauhawm reng.

Krishna hian ISL-ah match 107 khelin goal 55 a khung a, assist vawi 26 a nei. Season hman zawh takah khan league match 25 khelin goal 13 a khung a, assist vawi thum a nei bawk.

Odisha tana chanchin lawmawm dang chu Spanish defender Carlos Delgado cham tur hi a ni. Valencia defender hlui hian kum hnih dang cham turin contract thar a ziak a, a tawnhriat ringawt pawh Odisha tan a hlu.

Goddard a chhuak

Odisha-in player langsar pahnih an chelh laiin Lalthuammawia Ralte, Pranjal Bhumij, Aniket Jadhav, Michael Soosairaj, Vignesh Dakshinamurthy, Princeton Rebello, Sahil Panwar leh Cy Goddard te chu an chhuahtir a, Odisha tan an khelh chhunzawm dawn lo.

Kum 27 mi Cy Goddard hi ISL-ah a la cham chhunzawm zel dawn em, a hriat loh. London-a piang, Japan tana age level lama inlan ṭhin Goddard hian Serie B, Cypriot First Division, A League leh US second division lamah te a lo khel tawh.

Tottenham Hotspur academy chhuak niin, season hman zawh takah Odisha tan league match 14 chiah a khel a, assist vawi hnih a nei.

Chhuak dangte

ISL club langsarte an inṭhuahfai nual a, ui tak chungin inṭhen pawh an awm. Kerala Blasters chuan Marko Leskovic, Daisuke Sakai, Fedor Cernych, Dimitrios Diamantakos, Karanjit Singh leh Lara Sharma te nen an inṭhen thu an puang.

Kum 33 mi Lešković hi Croatia tan pawha vawi li inlan tawh niin, centre back a ni a, kum 2021 khan Dinamo Zagreb aṭangin Blasters a zawm. Kum 27 mi Sakai hi Japan tan age level hrang hranga lo inlan tawh niin, Blasters-ah season khat chiah a khel tihin a chhuak dawn.

Kum 33 mi Fedor Cernych hi Lithuania tana vawi 91 inlana goal 15 khung thei a ni a, Belarusian Premier League leh Polish top flight league thlenga lo khel tawh niin, Russian Premier League club Dynamo Moscow tan a khel tawh.

Diamantakos chu

Greece tana vawi nga inlan tawh, Blasters chhuahsantu Diamantakos hi Olympiacos tana Superleague Greece nomawi lo chawi tawh a ni a, German second division lamah a khel tawh bawk. Season hman zawh takah khan league match 17 khela goal 13 khungin, assist vawi thum a nei a, East Bengal nen sawizawm a ni.

NorthEast United-in Manvir Singh, Gani Nigam, Gourav Bora, Hira Mondal leh Rochharzela te an chhuahtir a, Chennaiyin chuan Jamshedpur aṭangin defensive midfielder Jitendra Singh chu kum hnih atan contract an ziahpui.

Chennaiyin hian Jamshedpur aṭangin Elsinho an la lut bawk a, Brazilian defensive midfielder hi kum hnih atan contract an ziahpui. Brazil leh Mexico vela inkhela eizawng tawh a ni a, JFC tan pawh season a hmang ṭha hle.