Belgium captain De Bruyne a fimkhur
European Championship 2024 a hnai a, group stage aṭanga tlang tur inrinsiakna pawh a boruak chho viau - Belgium captain Kevin De Bruyne chuan group E-a an khingpui turte chu hriatthiam harsa tak an nih thu a sawi.
Belgium hi Slovakia, Romania leh Ukraine te nen an awmkhawm; player an neih dan leh an sulhnu neih tawh ṭhin dan chhut chuan Red Devils hi an buk a rit a, sawi lawk vek theih erawh a ni bik lo thung.
De Bruyne chuan, "Champion tura rinkai kan niah ka ngai lo, ka hmuh dan chuan ram tak tak hian min hmachhawn huphurh hran lo ang, a tir aṭanga kan khingpui turte pawh hriatthiam an harsa hle a ni," a ti.
Kum 32 mi De Bruyne hian Belgium tan match 100 a khel tling tawh a, goal 27 a khungin a ṭhiante khung tur vawi 49 a siamsak tawh bawk. Ram tan tawnhriat a nei hnem tawk tawh a, a kum ngaihtuahin a hun hnuhnung lam a ni ve tawh bawk.
Manchester City midfielder De Bruyne chuan, "Inelna lian tak tak World Cup leh Euro te ka lo khel tawh ṭhin, tournament ṭhenkhatah erawh hliam vangin beisei anga ka khelh theih loh chang a awm.
"Team a inher danglam chho ve zel a, tun hma lama kan team leh tuna mi chu a danglam tawh hle. Inelna tak kan hmachhawn hma ngeiin kan insiamrem hman ka beisei," a ti.
Belgium hian Nilaini zan khan friendly match-ah Montenegro chu 2-0 in an hneh, he inkhelah hian De Bruyne leh Arsenal forward Leandro Trossard ten goal an khung. Inrinni zanah Luxembourg nen Euro inbuatsaih nan an inkhel leh ang.
Domenico Tedesco enkawl Belgium squad-ah hian Thibaut Courtois a tel lo. Real Madrid goalkeeper hi hun rei tak inhliam vangin a chawl a, chutihrualin Champions League final kha ṭha takin a khel thei tawh, an ko lo hian zawhna a ti tam hle.
De Bruyne chuan, "Duhthusamah chuan player ṭha zawng zawng hi ram tan inkhel thei se ka tui, ani koh a nih loh chhan hi kei chuan a chhungril ka hre ve lem lo. Goalkeeper pathum dang kan la nei a, anni hi ka ringtawk tur a ni, tuna kan duhthlan theih an ni," a ti.
Courtois a inlan dawn loh lai hian, an elpui Ukraine tan Andriy Lunin a inlan dawn thung. Club lamah chuan Lunin hi Courtois thachhangdawltu chauh a ni a, a inhliam leh khelh theih loh karlaka Spanish club-in si ban nghaktu atana an hman ṭhin a ni.
Ukraine hian Chelsea forward Mykhailo Mudryk leh Arsenal defender Oleksandr Zinchenko te an nei a, indo vangin an ram buaina la reh chiah lo mah se Euro an khel dawn a, khelmual chhung bakah a pawn lamah boruak an nei leh ngeiin a rinawm.
