Quarterfinal-ah Lakshya Sen

India tlangval badminton khel thiam Lakshya Sen chuan Indonesian Open tournament khelh laiah quarterfinal a in vaw kai a, hmeichhe doubles lamah Treesa Jolly leh Gayatri Gopichand te erawh an zinkawng a tawp.

Nimin last 16 inkhelah Sen-a hian Kenta Nishimoto chu 21-9, 21-15 in a hneh - Indian tlangval hian Japanese star lakah a tir aṭanga a tawp thlengin harsatna lian tham a tawk lo.

Treesa Jolly leh Gayatri Gopichand te ṭangdun erawhin Japanese nula Mayu Matsumoto leh Wakana Nagahara te inkawp chu 21-19, 19-21, 19-21 in an ngam lo thung.

Nizan khan mipa singles lamah Priyanshu Rajawat chuan world champion ni lai Kunlavut Vitidsarn a hmachhawn a, result erawh kan hre hman lo thung a ni.