Chhetri thlah zanah India chak zo lo
India captain Sunil Chhetri chuan ram tana a match hnuhnung berah India a chakpui zo lo a, Ningani zan khan World Cup 2026 qualifier second round-ah Kuwait chu 0-0 in an inhnehtawkpui.
Salt Lake Stadium, Kolkata-ah fans 58,921 an pungkhawm a, India inkhel a nih hrim hrim ai mahin Sunil Chhetri-a'n ram tana a match tawp ber a khelhna inkhel a nih avangin he inkhel hian ngaihven a hlawh.
Stadium chhungah Chhetri uina thu banner hmuh tur a awm nual a, fans tam takin lawmthu sawina an tarlang bawk. Ram tan match 151 khela goal 94 khungtu hian mittui nen khelmual a chhuahsan a, ram tana a match tawp bera goal a khung lo chu a ui vawng vawng ang.
Chhetri-a'n ram tana a match tawp ber a khelh zan hi Mizote tan pawh zan chhinchhiah tlak a ni a, Lunglei tlangval Edmund Lalrindika chuan ram tana a match hmasa ber a khel.
A ropui lo
Chhetri-a'n ram tana a match tawp ber a khelh hmain a pawimawh ber chu hnehna chan a nih thu a sawi a, "1-0 in chak ila, keiman goal khung lo mah ila, a pawi lo," a ti a, Blue Tigers-in hnehna an chan chu thil hlu ber a nih thu a sawi.
Mahse, Igor Stimac-a hnuaia India game a la ngai reng a, khualmuala 1-0 a an hneh tawh team lakah Blue Tigers-in an theihna an pholang thei lo a, Chhetri pawhin international football chawlhsan turin thutlukna dik a siam tih a lang.
Lallianzuala Chhangte chuan India tan bul ṭanin, minute 90 a khel tluan a, Lunglei tlangval hian mual vei lam sir aṭangin vawi tam ball thlawh lut mah se, Kuwait tlarhnungten awmze nei loah an chantir zel a, Manvir Singh tana a siamsak, Mohun Bagan striker-in a tauh luh lohte chu uiawm a tling.
A tawpah team pahnihin goal an khung lo ve ve a, international football-a Chhetri match tawp ber chu hmuhnawm lo taka khar a ni - India tan World Cup qualifier third round luh a harsa tawh dawn.
Beiseina chu
Group A inkhel dangah Afghanistan leh Qatar inkhelin, 0-0 in an inhnehtawk - India chak zawh loh hnuah Afghanistan-in point an hlawh chhuak ve leh a, Blue Tigers tan third round lut turin a harsa sawt tawh dawn.
June 11, Thawhlehni zanah India hian Qatar an lenchilh dawn a, an match tawp ber a ni ang. Hemi zanah vek hian Kuwait leh Afghanistan ten an match tawp ber an khel ve dawn bawk a, Qatar bakah team pathum hi an la tling thei vek!
Qatar hi tling chiang tawh an ni a, India leh Afghanistan point hmuh zat a inang a, Kuwait-in point li an nei. India hian Qatar an hneh chuan an tlang ang a, Qatar an draw a, Afghanistan leh Kuwait an in draw pawhin an tlang ang.
A tawi zawnga sawi chuan India tan Qatar lakah chak a ṭul a, an draw a nih chuan Afghanistan leh Kuwait inkhelah chak zawk an awm loh a ṭul thung - Blue Tigers hmabak a harsa takzet.
Mangṭha le Chhetri...
India captain Sunil Chhetri-a'n ram tan match 151 khela goal 94 khungin international football a chawlhsan ta a, Blue Tigers player piang tawh zinga ropui ber ang hiala tam takin an ngai pawh a awm lo hran lo.
Chhetri-a'n ram tana inkhelh a chawlhsan tur thu a puan khan ISL club mai ni loin Indian Premier League club engemaw zatin thlahna thu an tarlang a, India ram infiammi langsar zingah cricketer Virat Kohli, badminton legend PV Sindhu, track & field athlete Neeraj Chopra, table tennis player lar Manika Batra leh Bollywood actor Ranveer Singh ten an uina leh thlahna thu an tarlang.
Ningani zanah Chhetri hian ram tana a match tawp ber a khel ta nge nge a, Bengaluru striker thlahna thu hmuh tur tam tak a awm - a langsar zual kan tarlang e.
