Mizo hming a mawi leh ta

Kuwait lakah India tan Lallianzuala Chhangte chuan bul a ṭan a, bench-ah Edmund Lalrindika a awm bawk. Lza'n minute 90 a khel tluan a, minute 83-naah Edmund Lalrindika a lut - amah ang thoa ram tana a match hmasa ber kheltu Jay Gupta a thlak.

Edmund hi kum nga chhunga I League player ni chunga ram tana match khel hmasa ber a ni a, Indian Super League avangin I League hi en kan a hlawh ta hle - Edmund bakah hian David Lalhlansanga chu India squad-ah hian a awm a, I League player zingah anni pahnih hi Blue Tigers squad-a awm phak an ni.

Lunglei tlangval Edmund-a'n ram tana a match hmasa ber a khelh avangin Blue Tigers senior team tana Mizo player inlan tawh zat hi 15 an ni ta a, Mizo zinga India senior team tana khel hmasa ber chu Jerry Zirsanga a ni.

Mohun Bagan leh Dempo tan pawha lo khel tawh Jerry-a hian November 5, 2004 khan Kuwait lakah goal khungin, India tana goal khung naupang ber record a siam bawk a, kum 16 leh ni 311 mi a ni.

Mizo zinga India tana inlan hnem ber chu Jeje Lalpekhlua a ni a, South Tuipui bialtu MLA ni ta hian ram tan match 56 khelin goal 23 a khung. Lianzuala'n ram tan match 36 khelin goal sarih a khung a, assist vawi hnih a nei.

Lalengmawia Ralte (18 matches) leh Lalrindika Ralte (16) chu Mizo player zinga ram tana match 10 chuang khel thei an ni bawk a, anni bakah hian S. Malsawmtluanga, Robert Lalthlamuana, Lalchhuanmawia Fanai, Isaac Vanmalsawma, Daniel Lalhlimpuia, Jerry Lalrinzuala, Lalruatthara, R. Laldanmawia leh Lalchungnunga te chu India tana lo inlan tawh an ni.