Mizoram Sports Conclave 2024 nei dawn

June 13, Ningani aṭanga neih ṭan tur Mizoram Sports Conclave, 2024 atana inbuatsaih nan, Mizoram States Sports Council chuan nimin khan sports association hruaitu ṭhenkhatte nen inkawm hona an nei.

Baptist Centre, Falkland-a neih tur Conclave chungchanga inkawmhona kaihruaitu MSSC secretary John Ṭanpuia chuan, "India-in kum 2036 Olympic Games thlen a tum a, he huna Mizo ṭhalai tam zawk an tel theihna tura inbuatsaihna turin Mizoram Sports Conclave 2024 hi buatsaih a ni dawn a ni," a ti.

June 14, Zirtawpni thleng neih tur conclave-ah hian India ram chhunga infiamna lama sulhnu lo nei tawhte chu sawm an ni a, sorkar laipui aṭang mai bakah state ṭhenawm aṭangin Minister te leh sports lama sorkar hotu lute sawm an ni.

John Ṭanpuia chuan, "India rama chanchinbu lian tak tak, Times of India, Indian Express leh Sportstar Editor-te lo kal tura sawm an ni a, anni hi panel-ah ṭhuin, sports lam hmsawnna tur hrang hrang zawh theih an ni dawn a ni," a ti a, India rama infiamnain hma a sawn theih nana sum seng tam company Tata Trust, Inspire Institute of Sports, Tata Steel Ltd. leh Reliance Foundation Sports te chu sawm an nih thu a sawi bawk.

Mizoram State Sports Council hnuaiah hian sports association hrang hrang 33 an awm mek a, heng zingah hian Mizoram Boxing Association, Mizoram Weightlifting Association, Mizoram Wrestling Association, Hockey Mizoram, Mizoram Table Tennis Association leh Mizoram Amateur Taekwondo Association te chu ngaih pawimawh hmasak an ni.