French Open Final : Swiatek hmaah Jasmine Paolini

Iga Swiatek chuan French Open nomawi a kawl lai humhim turin match khat chak a la hmabak, vawiin chawhnu dar 2:00 hian Jasmine Paolini nen final an khel ang.

Polish nula Swiatek hi a champion a nih chuan Grand Slam title pangana a ni dawn. Roland Garros bik atana palina a ni bawk ang - Paolini tan erawh major tournament final hmasa ber a ni dawn thung.

Gauff hnehtu

Ningani zan khan semifinal khelh niin, seeded pakhatna Swiatek hian US Open champion lai Coco Gauff chu 6-2, 6-4 in a hneh. Game hmasa berah a khingpui service a chhuhsak a, set hnihnaah service hmasa bawkin inkhel a thunun tluan.

Kum 20 mi Gauff hian season hmasa French Open final-ah khan Swiatek hi a ngam lo bawk, an intawn tawh ṭhina record a neih ṭhat loh chu siamṭhat tum mah se tunah chuan a thei ta rih lo a ni, vawi 12 an inkhelh tawhah ṭum 11 a tlawm.

Swiatek chuan, "Ka ruahman lawk angin ka khel thei a, boruak rit leh harsa ka insiam duh lo. Season hmasa kan intawn pawh khan hmachhawn a harsa tih ka hre tawh, tunah pawh a la awlsam chuang lo.

"Tunah chuan final atan rilru zawng zawng ka pe tawh ang," a ti. Swiatek hian season a hmang ṭha hle a, a bik takin French Open-ah phei chuan player buk rit fal ber a ni, a champion leh a nih pawhin a mak lo ang.

Hmel thar Paolini

Jasmine Paolini hi kum 28 mi a ni tawh a, tennis khawvelah chuan mi thar a ni lo - mahse Grand Slam bikah chuan final a khelh vawi khatna tur a nih avangin hmel thar tia sawi theih a ni ve bawk.

Italian nula hian tleirawl duhawm Mirra Andreeva chu 6-3, 6-1 in a hneh; Andreeva hi seeded pahnina Aryna Sabalenka hneh theitu kha a ni a, an awmna lam aṭanga final lut thei nih hi a nep lo hle.

Seeded 12-na Paolini chuan, "Grand Slam final khelh hi ka tan chuan duhthusam thleng dik a ni. Iga Swiatek ka hmachawn dawn a ni a, tihsual neih zeuh pawh a pawi ngawt ang. Chutihrualin hei leh chen ka thleng tawh a, tawpsan mai ka tum lo," a ti.

Paolini hian kumin French Open-ah hian Naomi Osaka lakah set khat a hloh a, a bak chu set hloh miah loin a khingpui a hneh vek. Paolini tan mahni service hum ṭhat a pawimawh dawn a, service vawi khat hloh lek pawh set hloh zui theihna a ni tih a hriat a ngai ang.

Champion thar awm dawn

French Open mipa semifinal chu nizan khan khelh niin, seeded pahnihna Jannik Sinner leh Carlos Alcaraz an inhmachhawn a, inkhel dangah Casper Ruud leh Alexander Zverev te an inkhel thung - result erawh kan hre hman lo.

Semifinal lut player pali zingah season danga French Open champion an la awm ngai lo, kuminah an zinga tu emaw ber chuan Roland Garros title thar a nei dawn tihna a ni - Pathianni tlaiah final khelh tur a ni ang.

French Open vawi 14 champion tawh Rafael Nadal chu inlan mah se Zverev hneh loin a tla a, champion lai Novak Djokovic pawh quarterfinal khelh hmain a khup hliam vangin a inhnukdawk - player dang tan kawng a inhawng ta a ni.