Indo-Pak Weekend

ICC T20 World Cup chu USA lamah khelh chhunzawm zel a ni a. He cricket version tawi ber T20-ah hi chuan, team te zawka ngaih te pawhin, an aia team hrawl zawk te an tukzal ni a thleng ve fo chu a nih hi maw!

Aw America

Kumin chhunga cricket mai ni lo, infiamna khawvelah 'upset turu bera' mi tam zawkin an chhal chu tun Ningani khan a thleng tlat mai. A thlengtu branch USA-in, khelmual chhungah mikhual laka ṭhat tum bik loin, ICC T20 World Cup-a runners up ni lai Pakistan an hneh tlat mai. A ni, USA lakah Pakistan an mualpho.

Mumang a ni lo

USA-in a ṭhenawm Canada a hneh hnuah, Pakistan chu super over khelhpui ngai hial khawpin a chhaih buai hnuah, a tlawm zui bawk. Super 8 lut thei turin, dinhmun ṭha takah a inhlangkai ta. He USA team-ah hian India chhulchhuak mi panga leh Pakistan chhulchhuak mi pahnih an awm.

He vai kan tih te hi, India rama Ranji Trophy thlenga lo khel tawh, US-a pem thla, tuna USA team innghahna ber te an ni. An captain Monak Patel-a ho hian an chhe zawk zawk bik lo tih a chiang. World Cup khelh ṭan hmain Bangladesh team pawh an tlawm tawh a, Pakistan an hneh leh chiah hian vanneih ngawt chu a ni lo, tih a lang.

Pathianni zan

Infiamna khawvela thawm ring ber zinga mi, he Silly Point-ah ngei pawh kan lo thailan fo chu, cricket inkhela India leh Pakistan-in tum hun hi a ni a. World Cup a nih leh lek phei chuan, Mumbai leh Delhi kawtthler pawh 'bandh' an huaihawt ta emaw tih mai turin lirthei chevel a reh duh zel ṭhin a ni.

Tunhnai boruak erawh han bihchian deuhin, India hi a chungnung zawk tura ngaih an ni a. Tun hma deuha India leh Pakistan intum inkhel inhnehtawk tak ang kha tunhnai bik an inhmachhawnah hian kan hmu ta meuh lo. Amaherawhchu, Indo-Pak cricket hi chu a boruak hi a te tak tak thei lo.