England aiawh tur an chiang ta

Gareth Southgate-a'n European Championship khel tur player 33 a koh chu thlitfim an ni a, tunah chuan inelna tak hmachhawn tur player 26 chauh an bang ta.

Three Lions manager Southgate-a'n James Maddison a chhawk hnuah Jack Grealish a paih! Anni bakah hian goalkeeper James Trafford, defender Jarrad Branthwaite, Harry Maguire, Jarell Quansah leh midfielder Curtis Jones te tan hmun a awm lo.

Southgate chuan, "Squad puan theih nan hun tawp nghah kher kha a ngai ka ti lem lo, player 33 kan koh phawt avang khan mi ṭhenkhat chu rilru hah leh ngaihtuahna seng thiam lo takin an awm tih pawh ka hria.

"Tunah chuan mitinin an nihna leh dinhmun tur tak an hre tawh a, rilru hahdam leh engthawl takin an awm thei tawh ang," a ti a, inelna ṭan hmain hun tam tawh lo mah se inbuatsaihna ṭha tak an neih theih a beisei thu a sawi tel bawk.

England hian Euro 2020 kha final an lut a, anmahni khelmual hmanthiam leh chhuan em em Wembley Stadium-ah ngei Italy hneh loin pahnihna an ni, kuminah nomawi chawi ngei an tum dawn a ni.

Euro final an thlen ṭuma player koh zinga mi - Maguire, Kalvin Phillips, Raheem Sterling, Mason Mount, Jordan Henderson, Marcus Rashford, Jadon Sancho leh Grealish te chuan tun ṭumah hian Germany an pan ve dawn lo.

Team thar din chungchang zawhna chhangin Southgate chuan, "Team indin thar reng a ngai a, a pawimawh ber chu engtiangin nge kan ram team ṭha ber kan neih theih ang tih ngaihtuah a ni.

"Player tawnhriat nei ṭha tak tak kan nei a, ṭhenkhat chu taksa lam harsatna vangin an inlan thei lo thung," a ti a, player thlan chungchangah a duhthusam ang thlap ni thei lo mah se beisei a nei sang tih a sawi bawk.

England hi Group C-ah Slovenia, Denmark leh Serbia te nen an awmkhawm. An match hmasa ber atan June 16, Pathianni zanlaiah Serbia nen an inhmachhawn dawn a ni.

England Squad:

Goalkeepers: Dean Henderson (Crystal Palace), Jordan Pickford (Everton), Aaron Ramsdale (Arsenal).

Defenders: Lewis Dunk (Brighton), Joe Gomez (Liverpool), Marc Guehi (Crystal Palace), Ezri Konsa (Aston Villa), Luke Shaw (Manchester United), John Stones (Manchester City), Kieran Trippier (Newcastle), Kyle Walker (Manchester City).

Midfielders: Trent Alexander-Arnold (Liverpool), Conor Gallagher (Chelsea), Kobbie Mainoo (Manchester United), Declan Rice (Arsenal), Adam Wharton (Crystal Palace).

Forwards: Jude Bellingham (Real Madrid), Jarrod Bowen (West Ham), Eberechi Eze (Crystal Palace), Phil Foden (Manchester City), Anthony Gordon (Newcastle), Harry Kane (Bayern Munich), Cole Palmer (Chelsea), Bukayo Saka (Arsenal), Ivan Toney (Brentford), Ollie Watkins (Aston Villa).