Red Bull-ah Perez a nghet

Sergio Perez chuan Red Bull car khalh chhunzawm zel turin season hnih daih contract a ziak thar, tuna an inrem ang chuan kum 2026 season tawp thleng a cham dawn tihna a ni.

Formula 1 team champion Red Bull hian Mexican driver chungah rinna an nghat a, kum 2021 aṭanga an thawhhona hi chhunzawm zel an duh - Mercedes pan mai thei anga thuthang awm chu a tawp zui ta rih bawk.

Tun season tawp rualin Lewis Hamilton-a'n Mercedes chhuahsanin Ferrari a zawm dawn a, world champion vawi sarih ni tawh Hamilton hmun ruak luah thei zingah Perez hming a ri ring, mahse Red Bull car khalh chhunzawm a thlang ta zawk a ni.

Red Bull team principal Christian Horner chuan, "Infiamna khawvelah chuan mahni chauha hlawhtlin theih a ni lo a, team nghet leh ṭha neih a ngai. Checo leh Max Verstappen ten boruak nuam leh ṭhatak an nei mek.

"Season kal laiah pawh inelna ṭha takin kan hmachhawn ho mek a ni. Tun hnai inelna ṭhenkhat chu hautak deuh mah se, ṭha taka a hmawr bawk thei turin beiseina kan nei mek," a ti.

June 9, Pathianni zan dar 11:30 hian Canadian Grand Prix an tlan leh dawn, tun hnaiah Red Bull hian elphak thuak thuaktu an neih avangin an tan inthlahdah a remchang lo.