Boston Celtics tan hna a awlsam

Jaylen Brown lansarhna inkhelah Boston Celtics chuan Dallas Mavericks chu 107-89 in an hneh a, nimin zing NBA Finals game 1 inkhelah a chungnung zawk an ni.

Kum 27 mi Brown hian point 22 a nei a, a ṭhiante zinga panga chuan point 10 an nei tling vek bawk - a vawi 18 nan NBA champion nih an tumna kawngah bul an ṭan fuh hle.

Inelna hi best of seven series hmanga khelh a ni a, champion tur chuan a tlem berah vawi li tal chak a ngai. June 10, Thawhṭanni zing dar 5:30-ah game 2 an khel leh dawn a ni.

TD Garden-a inkhelah Celtics hian point an nei tam a ni satliah lo a, anmahni basket an venhim dan chuan sawi zui a hlawh. Luka Doncic leh Kyrie Irving te awmna team hi point 89 chauh an neih tir.

Joe Mazzulla enkawl Boston Celtics hian chawlhlawk laiin point 29 ngawtin hma an hruai fal thei. Doncic-a point 30 hmangin Mavericks lamin an inkar sawr zim ve leh deuh mah se, a tawp lamah Celtics bawk an kang sang.

Brown chuan, "Kan inkar kha point riatah an rawn sawm zim hman a, tah khan inkhel tak tak chu a inṭan chiah. Min rawn pawh thlak chhohna kara kan thawh chhuah leh dan khan min ti lawm," tiin a sawi.

Boston Celtics tan Kristaps Porzingis a inlan leh thei tawh, chawn hliam vanga match 10 a khelh theih loh hnua inkhel leh chauh ni mah se a che ṭha nghal, point 20 a neih bakah rebound vawi 11 lain an chakna hnar pawimawh a ni phak.

Chak lo mah se Mavericks an la zam bik lo, an player pawimawh Doncic chuan, "Ṭhenkhat laiah kha chuan kan game pangngai kan khel thei, a tam zawkah erawh kan khingpui lamin inkhel an thunun thung a, kan tan a harsa hle.

"Game 1 aṭanga a lan dan chuan, keimahni basket lamah bik awh rebound lak tura ngaih kan la lo nasa, chu chuan na takin min nghawng a ni. Game 2 aṭanga chuan insiamṭhat ngei kan tum ang," tiin a sawi.

Dallas Mavericks han NBA title vawi khat chauh an la hlawh chhuak a, a vawi hnihna an beisei mek. Boston Celtics erawh Los Angeles Lakers (17 titles) champion hnem ber an ni a, record inṭawm an neih hi kalsan an tum ang.