Pathianni zan dar 8:00-ah India vs Pakistan

T20 Cricket World Cup-ah India-in June 9, Pathianni zan dar 8:00-ah an hmelma Pakistan an hmachhawn dawn. Men in Blue leh Shaheens hi awlsam taka group stage paltlang tura ngaih ni mah se Pakistan-in a thlengtu United States an hneh loh avangin Babar Azam leh a hoten pressure an ngah khawp ang.

Inkhelhna hmun tur hi Nassau County International Cricket Stadium, New York a ni a, US hi cricket ngainatna hmun a ni lo. Hei vang hian India leh Pakistan inkhel tur ticket hi he thuziah lai thleng chuan hralh zawh a la ni lo.

Tak tak maw?

TV leh online streaming lamah chuan mipui nuai 100 chuangin Indo Pak inkhel hi an en dawn a, a hmunah erawh entu 34,000 lenna a khat zo kher lo ang.

India leh Pakistan inkhel en man hi, a man tlawm pawh $350 a ni a, India pawisa chuan Rs 31,785 man daih a ni. Hetiang zat inkhel en man chawi hnuah pawh enna hian a chung a nei lo a, en man a to hret. Chutihrualin ṭhutna ṭha chin phei chu $2,500 - $10,000 daih a ni.

Inkhel en man hi New York-a South Asian chengte tan chuan a to lulai hret. Sum lakluh dan vantlang chinin thla khatah chawhrualin $9,300 an la lut a, sum lalut tlem hoin thla khatah $2,625 an la lut.

Chutihrualin mi nawlpui ticket $350 man hi chu hralh zawh tawh a ni a, mahse an hralh chhawn leh tura (black market) ngaih a ni. An hralh chhawn lehna hi $1,200 - $1,400 a ni pha daih. Heng vang hian stadium hi a khah zawh a rinawm loh.

Beisei pha lo Pak

India-in an match hmasa berah Ireland an sawp a, Pakistan erawh United States lakah an tlawm. Cricket khel ram ropui ber zinga mi Shaheens-in cricket an khel ngai tih pawh hriat loh US an hneh lo a, an mualpho takzet.

Pakistan tan mualphona hliahkhuhna ṭha ber chu India hneh a ni a, IPL khel zo hlim player awm khawmna Men in Blue hneh erawh a harsa ang.

Shaheens cricket legend Wasim Akram chuan, "Pakistan cricket tan a ṭha lo. US an hneh loh avangin Super 8 khelh phak a harsa dawn. Babar leh Shadab lo kha chu khel ṭha an awm lo a, fielding a chhe thlawt a, Pakistan cricket khelh dan hrim hrim kha a satliah," tiin a sawi.

A hmuhnawm dawn

India ṭantute chuan Rohit Sharma hoten Pakistan hi sawpin inhnehtawk lo mah se hmuhnawm an tidawn tho. Chutihrualin Pakistan batter Mohammad Rizwan leh Babar Azam te hi an khelh ṭhat ṭum chuan team chakpui thei an ni a, bowling lamah Shaheen Afridi, Haris Rauf leh Naseem Shah ten India batter-te tan harsatna an siam thei ang.

Men in Blue-in match hmasa berah Ireland an sawp a, Virat Kohli a khel chhia. Kohli hi Pakistan lakah a che ṭha ṭhin a, India captain hlui hi Hamara Desh mit fukna tur a ni. India hian batting line up an neih ṭhat bakah khawvel bowler ṭha bera chhal ngam Jasprit Bumrah te an kawl a, Pakistan hmachhawn turin an inringtawk khawp ang.