Djokovic khup an zai hlawhtling

Novak Djokovic chu a khup hliam zai a ni a, world number 1 hi inkhel thei loin awm rih mah se a dinhmun a ṭha chho zel niin a sawi.

French Open quarterfinal an khelh hmain Djokovic hi a inhliam a, champion nomawi a kawl lai a hloh bakah world ranking a chhuah thar hunah number 1 a nihna pawh a hloh tel nghal ang.

Serbian star Djokovic chuan, "Tennis match ka khelh hnuhnung berah khan hnehna chang mah ila ka rilru a hrehawm hle, a chhan chu hliam nei chunga court ka chhuahsan a ngaih vang kha a ni.

"Hreh tak chungin French Open aṭanga ka inhnuhdawh a ngai a, a rang thei ang berin ka damdawi lam thiamten zai ka ngaih thu min hrilh a, an thurawn angin ka awm zui nghal bawk.

"Tunah chuan a ṭha thei ang bera ka lo kir leh theih hun ka nghak a, ṭha taka tennis ka khelh leh theih pawh ka beisei. Harsatna ka tawh laiin min thlawptu tam tak an awm a, an chungah ka lawm takzet," a ti.

Tuna Djokovic hliam hian French Open chauh a nghawng dawn lo niin a lang. Vawi sarih a champion tawhna Wimbledon chu July 1-14 chhungin khelh a ni dawn a, hei bakah hian July 27 aṭanga August 4 chhungin Paris Olympic a awm dawn bawk.

Grand Slam vawi 24 champion tawh hian engtik hunah nge ṭha takin tennis a khelh leh theih dawn tih a chiang rih lo. A lo kir leh a nih pawhin kum 37 mi hian ngai a awh leh thei ang em tih chu zawhna lian tak a ni tawh ang.