Kiang ru le, hei chu Rafael Nadal ta a ni

'Nomawi 13-na chawi, Grand Slam title 20-na lak leh Match 100 chak' - heng thil ropui pathum hi Rafael Nadal-a'n French Open aṭanga sulhnu ropui a hnut chhiah a ni! Nadal a awm chhung chuan player dang tan Paris khawpuiah beisei tih san ngam chi a ni lo, Roland Garros chu Nadal ta a ni.

Pathianni zan French Open 2020 hmawr bawknaah Nadal chuan world number 1 Novak Djokovic chu darkar hnih leh minute 41 chhungin 6-0, 6-1, 7-5 in a sawp a, seeded pahnihna hi a vawi 13 nan clay court inelna lianah a champion.

Spanish star hian French Open nomawi 13 a chawi tling ta a, Grand Slam champion hnem lamah Roger Federer (20 titles) nih rualin record nei ṭha ber an ni. An hnungah hian nomawi 17 chawitu Djokovic a awm ve bawk.

BBC lama tennis mi ril leh hre zaute chuan Pathianni zan final hi, "French Open nomawi inchuhna chauh a ni lo, major title la hnem ber tur zawnna a ni tel bawk," tiin an sawi a, inkhel pawimawh leh hriatreng tawh tur a nihzia a tichiang hle.

Ṭhum vawra chak zawk Djokovic-a'n service hmasak a thlang a, game la hmasain a dinhmun a ṭha tura ngaih a ni. Beisei ang erawh a ni lo, a service hi chhuhsak nghal a ni a, game la loa set a hloh hnuah set hnihnaah pawh game hnih chauh a la thei.

World number 2 Nadal-a'n awlsam takin set hmasa pahnih a la. TV lama Star Sports commentator chuan, "He hmunah hian Nadal laka set hnih hloh hmasak tawh chuan thawh leh theih a ni tawh lo," tiin a rawn sawi a, inkhel la zo lo mah se mi tam tak chuan champion tur a chiang tawhah an ngai.

Tennis player zingah rilru paukhauh ber thlang dawn ila Djokovic hi pakhatna a nih loh pawhin vote hmu sang ber zinga mi a ni ngei ang. Set thumna an khel chhunzawm a, game hnih a lak meuh chuan inkhel boruak pawh a danglam ta.

"Court chhungah Novak Djokovic a awm a nih chuan, court a chhuahsan hma chuan inkhel a la zo lo," tiin Star Sports commentator bawkin a rawn sawi zui. Serbian tlangval huaisenna leh tumruhna hretute chuan a thusawi hi an lo pawm nghal thlap.

Mahse, world number 1 a khelh ṭhat zawh poh leh Nadal a kang sang zel emaw tih mai tur a ni. Novak-a backhand na leh kawh zet chu a lo vaw let zel a, a thiam dan taka ball vaw vir chungin Nadal forehand chu Djokovic tan dan rual a ni ta chuang lo.

Rafael Nadal-a'n French Open bikah hian nomawi a chawi hmasak ber aṭangin season 15 zet a liam tawh, tunah zet chuan Paris khawpuiah hian match 100 teh meuh a chak ta, ani aia nomawi chawi hnem an awm loh ang bawkin hnehna chang hnem ber a ni bawk. Kumin bikah hian set a hloh lo!

Kum 34 mi a ni tawh a, a kum rualpui dangte chu an chawlh tawh bakah an vanglai a pel tawh. 'Tharum hmang hnem, tharum vanga hlawhtling, a daih rei lo ang' tih chu amah el tuten an sawiselna a ni ṭhin, mahse heng thu te hi thil holam mai a ni ta.

A kum rualpuite an zuai tawh hnuah Nadal chu a ṭha ber a la ni thei a; King of Clay a nihzia chu sawi nawn a ngai lo, a hlawhtling tawk loa an sawina Wimbledon-ah pawh vawi hnih a champion thei a, hard court aṭanga major title a lak pawh panga zet a ni - nang tennis ngainatu, Nadal hi fak mai rawh!

- Rafael Nadal

Tennis hi khelhna hmun a inang lo, grass, hard leh clay court-ah an khel ṭhin. Rafael Nadal hi clay court a inkhel thiam bik a ni a, a hming lem atan pawh 'King of Clay' tih an vuahsak hial.

Chak lo zawk Novak Djokovic chuan, "Tun ṭumah hian clay court lalpa i nihzia chu i lantir, a tak ngeiin ka tawng a ni," tiin Rafa chu clay court-ah chuan midang chunga leng a nihzia a sawi, Roland Garros-ah hian vawi riat inhmachhawn tawhin vawi khat chauh a la hneh.

French Open hma kha chuan Djokovic hian tun season-ah hneh loh a la tawng lo, US Open-ah khan line judge ball a vuak per avangin hnawl (disqualify) a ni a, match pangngaia a chak loh hmasak ber ṭum a tawng. 

Djokovic hi kum 33 mi a ni tawh a, a hun hnuhnung lam chu a hmang tawh. A theihna thlir chuan Federer leh Nadal te record khum thei tur a ni, chutihrualin major title la hnem ber ni tur chuan hliam nei loa khelh a mamawh a, vanneih a ngai bawk ang.

Nadal leh Djokovic te hi vawi 56 an inhmachhawn tawh a, chak hnem zawk Nadal hian ṭum 29 hnehna a chang tawh. Grand Slam bikah chuan Nadal a chungnung a, vawi 10 chakin ṭum ruk a chak lo thung a ni.

Mipa tennis player piang tawh zinga ropui leh thiam bera mi tam takin an ngaih chu Roger Federer a ni a, Swiss star hian Grand Slam nomawi 20 a chawi tawh. Federer-a'n a vanglai pawha a hneh hleih theih loh chu Rafael Nadal hi a ni a, player pahnih zingah ropui zawk sawi theih a ni lo, a thlangtu thinlung a ni.

Federer chuan, "Ka ṭhianpa leh player ropui ni bawk Rafa hi ka zah hle, hun rei tak chhung chu ka elpui hautak ber a ni tawh. Kan inti chak tawn a, kan pahnih hian player ṭha zawk ni turin kan inchhem alh tawn. Grand Slam title 20-na a la hi ka lawmpui takzet, a bik takin Roland Garros vawi 13 champion hi chu infiamna huanga thil hlu bik a ni.

Amah chauh ni loin a team pawh ka lawmpui, hetiang hlawhtlinna hi chu mahni maia tih theih a ni lo. Nomawi lian 20 hi kan pahnih tan a tawpna a nih loh ka beisei, zin kawng kan zawhna rahbi pakhat a nih ka duh. Rafa i thil tih hi a ropui, i phu takzet," a ti.

Tennis season khatah hian Grand Slam pali - Australian Open, French Open, Wimbledon leh US Open te a awm a, hlu bik an awm lo - an hlut dan a inang vek. Inelna ngaihhlutah hian vawi khat champion chauh pawh a harsa, Federer, Nadal leh Djokovic te sulhnu hi a ropui takzet.

•    Paris khawpuiah ruah a tla deuh a, stadium chu a chung khuhna hman a ni.

•    Ṭhum vawra chak zawk Novak Djokovic chuan service hmasak a thlang.

•    Djokovic-a'n a service hmasa a, mahse Nadal chuan a lo chhuhsak nghal.

•    Set khatna bikah Nadal-a'n tihsual a nei mang loa ngaih a ni, a vawi khat nan Djokovic lakah Grand Slam huangah set hmasa ber chu 6-0 in a la.

•    Djokovic bawkin set hnihnaah pawh a service hmasa leh a, break point inchhanhim hramin a game hmasa ber a la hram.

•    Set hnihna chhunga game thumna leh game nganaah Nadal-a'n a khingpui service chhuhsak lehin, nuamsa takin set a la.

•    Djokovic-a'n set thumna bul ṭan lehin game hmasa pahnih an la ve ve a, 2-2 a nih hnuah Nadal-a'n service a chhuhsak.

•    Nadal-a'n a vawi khat nan a service a hloh ve a, break point hmasa panga inchhanhim mah se a parukna a dang zo lo.

•    Service hloh mah se Nadal bawkin Novak a chhuhsak zui leh a, 5-6 ni chungin a service chhunzawm.

•    Spanish tlangvalin a service game hnuhnung berah point a hloh lo, 40-0 a nih hnuah 'Ace' siamin a chak.