Belgium ngamtu England an mawi

Premier League vanga ngaihven hlawh England football team-in thu maia thamral an tum tawh lo- Pathianni zan khan team ṭha Belgium chu Nations League-ah 2-1 in an hneh a, Belgium thiampuipa Kevin de Bruyne-a'n Euro leh World Cup nomawi chawi tura England an ṭhat tawk thu a lo sawi tawhna chu fakna satliah a ni lo tih an nem nghet. 

Belgium hian an goal khung khawl Romelu Lukaku penalty hmangin minute 16-na lekah goal hmahruai khung mah se England tan  Marcus Rashford (penalty) leh Mason Mount ten an chhanglet a, a tawpah England an chak. 

Group A2 inkhel dangah Denmark chuan 3-0 ngawtin Iceland an sawp bawk a,  Runar Mar Sigurjonsson chuan an lama a tih luh bakah Christian Eriksen leh Robert Skov-te chuan goal khat ve ve an khung bawk. 

Nilaini zan dar 12:15-ah Denmark hi England nen an inkhel lehnghal dawn a, team pahnih hi an phur vanglai tak a nih avangin inkhel en châkawm a ni. 

Wembley stadium a inkhela goal khung hmasa bertu chu Lukaku a ni a, Belgian striker hian Manchester United-in an chhuahtir kha an lo tihsualzia England leilungah ngei a lan nawn tir. 

England tlarhnunga Eric Dier leh  Harry Maguire inkawp ten Inter Milan striker pa chak hi an ngam lo hle a, Dier-a'n ven dan ṭha bera a hriat hmanga a tih tluk hnuah penalty a hlawh chhuak. 

Lukaku hian England si ban nghak Jordan Pickford chu chiang taka bum chungin goal hmahruai hi penalty aṭangin a khung a, a goal khung hi Belgium tan match 86 a khelh aṭanga a goal 53-na a ni. 

Manchester United tan match 96 a khelha goal 42 a khung chunga fak hlawh tawk lo striker hian a khelh ṭhat ni chuan European striker ṭha ber pawl a ni tih a pholang nawn a, a khel a hmuhnawm takzet. 

Harry Kane-a'n bul a ṭan loh avangin Liverpool captain Jordan Henderson chuan Three Lions tan captain armband a rawn hreng a, midfielder tawnhriat nei ṭha tawh tak hi minute 39-naa Thomas Meunier nen ball an inchuhna lamah awlsam takin a tlu. 

Referee-in penalty spot a kawk a, Marcus Rashford a lo pen chhuak. Manchester United striker hian harsatna nei loin goal-ah a chantir a, mualneitu England an phur sawt.

Minute 64-naah England-in an goal hnihna an khung zui a, Chelsea midfielder Mason Mount-a shot chuan Toby Alderweireld perin Belgium goal vengtu Simon Mignolet tan dan rual a ni lo.

Hun tawp thlengin goal dang a lut lo a, a tawpah 2-1 in England an chak - Belgium tan November 2018 hnua an tlawm hmasak ber a ni a, Three Lions-in world number 1 an hneh thei hi an lawm khawp ang. 

Belgium lamin hliam vangin  Eden Hazard, Thibaut Courtois leh Dries Mertens an chhawr thei lo a, Three Lions vanneihna kan sawi lui dawn a nih chuan heng player pathum ringawt khel thei lo pawh hi Belgium tan chuan chhiatpui tham a ni.

Chutihrual chuan Southgate-a'n an ṭhat dan berin team a rem bik lo tih hriat a ṭha a, Three Lions bench lam en chuan Harry Kane leh Jadon Sancho hmuh tur an awm - hliam vangin Raheem Sterling chu squad-ah a awm lo bawk.

Southgate-a tan tlarhnung lai erawh ngaihtuahna tibuai thei tak niin a lang a, Maguire leh Dier inkawpin mit an tlung tawk lo - Everton-ah sawisel a tawk nasa chungin goalkeeper Jordan Pickford chu rin nawn a ni a, fiahna hautak tia sawi tur a hmachhawn loh avangin sawiselna tur Belgium lakah a awm lo. 

England boss Southgate chuan, "Game level sang tak a ni a, player naupang tak tak kan kawlte tan kha chuan tawnhriat ropui tak a ni e. Game hautaka hnehna chang tur chuan tawrh ve pawh a ngai a, chutiang tak chuan ka player-ten an ti a ni," tiin a sawi.