Euro-a inrintawkna nei turin chak a pawimawh - Low

Germany chuan zanin dar 12:15 hian UEFA Nations League-ah Switzerland an mikhual dawn. League A group 4 inkhel dangah Ukraine-in Spain an mikhual bawk ang.

Joachim Low hoten Nations League-ah chak an harsat a, season hmasa berah chak an neih loh bakah tun season match hmasa pahnihah an hnehna an chang zo lo bawk. Chutihrualin Germany hian an match hnuhnung berah Ukraine an hneh a, Nations League-a an chakna hmasa ber a ni.

Germany boss Low chuan, "Chak hi kan tana pawimawh ber a ni a, Euro 2020 atana inrintawkna min petu tur a ni. Kan player-te hi an khelh ho tam tawk lo a, chuvangin an khelh ho tam zel nan hnehna kan chan zel hi a pawimawh," tiin a sawi.

Low hian Switzerland an hmachhawn hunah player a thlak danglam tam loh tur thu a sawi a, Ukraine an hmachhawn ṭumin Chelsea player pahnih Timo Werner leh Kai Havertz ten bul an ṭan lo.