Hamilton-a'n Schumacher nihrual

Lewis Hamilton chuan Eifel Grand Prix-ah hnehna a chang a, car intlansiakna sang berah hian vawi 91 ngawt hnehna chang tawhin record nei ṭha ber Michael Schumacher a record a nih rual chiah.

Mercedes driver hian Pathianni zana hnehna a chan leh tak avang hian championship lama a hmahruaina pawh a sawhnghet zel, a teammate Valtteri Bottas aiin point 69 ngawtin hma a huai fal ta, nomawi chawi turin a dinhmun a ṭha ta hle.

Britain star hian world title a la leh a nih chuan, champion hneh lamah pawh Schumacher (7 titles) a nihrual dawn bawk, kum 35 mi driver hian record ropui leh ṭha zawng zawng hi nihrual mai bakah khum theihna hun ṭha a nei dawn niin a lang.

F1 champion lai Hamilton chuan, "I naupan lai aṭanga i driver ngaihsan em em dinhmun ang kha i luah ve a nih chuan a lawmawm dan chu in suangtuah thiam mai ang, tuna ka hun tawn hlimawm zia hi thu a sawifiah chi a ni lo," tiin a sawi.