France leh Portugal an inhnehtawk

State de France-ah world champion France-in Nations League champion Portugal an mikhual a, 0-0 in an inhnehtawk.

Portugal hian khual muala point hlawh chhuak turin defensive game ṭha tak an khel a, player ṭha rual awmna France pawhin chance siam an harsat. Second half-ah Kylian Mbappe leh Paul Pogba ten an thiamna pholang ve bawk mah se goal hmuh tur a awm lo.

Mikhual team pawhin captain Ronaldo hmangin goal khung theihna tur an nei a,  France defender Lucas Hernández-a'n a dansak. 

Fernando Santos hoten match 19 an khelhah goal 12 chiah an chhuah a, Portugal tlarhnung a phui ṭha hle. Les Bleus-in an muala match 19 an khelha goal an khung lohna hmasa ber a ni a, match 27 an khelh aṭangin vawi 14 an clean sheet bawk.