A vawi li nan Swiatek a champion

French Open sawi rualin rilruah Iga Swiatek hming a lang chhunzawm zel dawn ta - Polish nula Swiatek hian a zawna a vawi thum nan Roland Garros nomawi a chawi a, a lak belh zel a nih pawhin a mak lo ang.

Inrinni zan khan Paris khawpuia tennis khelmual hmingthang Court Phillipe-Chatrier-ah hmeichhe final khelh niin, world number 1 Swaitek hian a khingpui Jasmine Paolini chu 6-2, 6-1 in a hneh.

Justine Henin chuan kum 2007 khan French Open title hi a zawnin vawi thum a lo la tawh, ani hnuah chuan Swiatek hi hetiang ti leh thei hmasa ber a ni a, kum 23 tling hlim chauh a la nih avangin hmabak a nei êng hle - French Open-ah vawi li a champion tawh.

Kum 23 mi Swiatek hian Grand Slam final vawi nga a khel tawh a, a la chak fai vek. French Open bakah hian kum 2022 khan US Open final lutin a lo champion zui nghal tawh bawk.

Final chu

Player pahnih tawnhriat neih tawh dan thlir chuan Swaitek buk a rit zawk a, tun tournament bik en pawhin player chungchuang a ni, chutihrualin Paolini pawh player ṭha tak tak kara final lut thei a nih avangin dah hniam a rem lo.

Italian player Paolini hian rin loh tak maiin a tir lamah Swiatek-i service hi a chhuhsak a, set hmasa zawk tir lamah 2-1 in hma a hruai a, engpawh thleng thei a nih avangin beiseina pawh a nei sang.

Mahse, seeded pakhatna Swiatek hi a talbuai zui lo - a service vawi khat hloh ve zauh mah se a chesual nawn lo, na takin a khingpui a nawr tawm chhunzawm nghal a, a tira che fuh Paolini tan thawh lehna kawng a hawnsak lo.

Clay court a ni bawk a, a duh tawkin inkhel a thunun a, a khingpui service vawi nga chhuhsak letin ama service a hloh nawn lo a, inkhel tawk tak tur anga lang hman kha an insawp leh ta zawk hle a ni.

Paris thununtu

Inelna tur lamah Swiatek hian Naomi Osaka a hmachhawn a, world number 1 hlui leh Grand Slam vawi li champion tawh lakah hian fiahna hautak a hmachhawn, set a hloh bakah harsa takin a chak hram.

Osaka nen an intawn hnuah erawh buaina a nei zui lo, nomawi a chawina kawnga a match hnuhnung pangaah phei chuan game 17 a la zawn vek a, a dinhnmun tiderthawng emaw han tibuai emaw phak an awm lo.

Paris khawpuia tennis inelna lian berah hian ṭum ruk a inlan tawh a, match 35 hnehna chang tawhin vawi hnih a chak lo - season ruk inlan aṭanga vawi li champion thei a nih avangin a ropuina sawi nep theih a ni lo ang.

Final match bik pawh hi darkar khat leh minute riat chhung lekin a chingfel thei, kuminah hian match ṭhenkhat chu darkar khat tling loa chinfel hman pawh a nei ṭhin, vanglai a hmang chho mek.

Swiatek a hlim

A vawi li nan a champion a, a tan thil lawmawm bik a ni. Swaitek chuan, "Ka tan chuan Paris khawpui hi hmun nuam a ni a, kum tin mai hian inkhelh hun hi ka nghakhlel em em ṭhin a, kuminah pawh ka duhthusam a thleng dik.

"A nihna takah chuan ka champion kawng hi a awlsam anga sawi theih pawh a ni. Chutihrualin, Naoimi nen kan inkhelh ṭum khan a chak lo zawk ka ni teuh hle a, harsa takin ka paltlang hram hram.

"Vanneihthlak takin match harsaah hnehna ka chang a, a hnu lamah erawh kawng a awlsam phah. Khua a lum zui a, boruak lum kha kan inkhelhna leilung nen a inrem hle, chu chuan nasa takin min pui," a ti.

Tennis khelhna hmun a inang lo hle, clay, hard leh grass court-ah ball kal dan hmang a inang lo vek a, hei vang hian player ten inkhelh thiam bikna hmun an nei ṭhin - Swiatek tan Paris khawpuia clay hi hmun duhthusam a ni chiang hle.

Mipa champion thar

French Open mipa inelna huangah champion thar kan hmu dawn - nizan khan Carlos Alcaraz leh Zlexander Zverev ten final an khel a, chanchinbu buatsaih laiin result kan hre hman lo.

Rafael Nadal-a'n French Open a awp hneh thei hle a, a kar lak leh a hun hnuhnung lamah Novak Djokovic a rawn lang ṭhin; kum 2009 khan Roger Federer a champion ve bawk - midang tan hmun a awm ngai lem lo tiin a sawi theih.

Tun season-ah erawh thawnthu a danglam - semifinal khel phak mi palite chu tun hma lama French Open champion la ni lo vek an ni a, champion thar kan hmu ngei dawn tih kha a chiang tawh a ni.

Alcaraz hian tun hmain Wimbledon leh US Open title a la tawh, final khel pakhat zawk Zverev erawhin major title a la hlawh chhuak lo thung a, inelna ngaihhlut Matsers 1000 leh Olympic gold medal erawh a la tawh thung.