Bul ṭanna chauh a la ni - Edmund
Kuwait laka India tana a match hmasa ber kheltu Edmund Lalrindika chuan a bul ṭanna chauh a la nih thu Vanglaini a hrilh a, Lunglei tlangval hi tun aia sang zawk thlen tumin a la inbuatsaih zel.
Edmund chuan, "Ka bul ṭanna chauh a la ni rih a, theihtawp chhuaha hma lam pan zel ka tum a ni," a ti a, Blue Tigers tan match tam zawk inlan thei tura inbuatsaih a tum.
June 6, Ningani zan khan FIFA World Cup 2026 qualifier-ah India chuan Kuwait hmachhawnin, 0-0 in an inhnehtawk a, minute 83-naah Edmund-a hi luhtir niin, ram tana a match hmasa ber a khel a ni.
Edmund chuan, "International football khelh chu a danglam hle. Game a rang a, tharum kan hmang nasa bawk. Rei lotê chauh la khel mah ila, nuam ka ti em em a ni.
"Rei tak hliam vanga ka chawlh reng hnuah ka duhthusam a thleng dik a, Pathian khawngaihna zara hun ṭha ka nei thei hi ka lawm hle a ni," tiin Vanglaini a hrilh.
AIFF Elite Academy-a awm ṭhin Edmund hian Bengaluru reserve team aṭanga a professional zinkawng zawh ṭanin, Indian Arrows, Bengaluru leh East Bengal tan a khel tawh a, a career ṭantir lamah beiseina sang mah se, hliam vanga a talbuai ve reng avangin beisei angin a khel chhuak thei lawk lo.
Mahse, season hmasa khan Edmund atan hun ṭha a her chhuak a, September 2023 khan Bengaluru aṭangin Inter Kashi chu season khat chhung loan-a khel turin a zawm.
I League club tharah hian Edmund-a a che ṭha a, season hman zawh takah khan inelna hrang hrangah match 31 khela goal sarih khungin assist vawi kua a nei a, India squad-ah koh a ni ta hial a ni.
March thla khan Edmund hian sawmna tam tak hnarin, Inter Kashi-ah a ngheta lut turin kum hnih chhung atan contract a ziak a, Canadian Premier League club Atlético Ottawa-a training neih a hmabak mek.
Edmund-a telna India hian June 11, Thawhlehni zan dar 9:15-ah Qatar an hmachhawn dawn a, FIFA World Cup 2026 qualifier second round paltlang turin India tan Qatar hneh a ṭul a, an draw chuan inkhel lehlama Kuwait leh Afghanistan inkhel result an ngaihchan tel a ṭul dawn thung.
June 8, Inrinni tlai khan Qatar panin India squad an chhuak a, Kuwait laka squad-a tel player pathum Subhasish Bose, Lalchungnunga leh Amey Ranawade te chu an tel ve tawh lo - Mizo pathum, Lallianzuala Chhangte, Edmund leh David Lalhlansanga te an la tel.
Durtlang tlangval Chungnunga hi Kuwait lakah khan a inlan lo a, Bose leh Amey Ranawade te pawh bench lamah an awm tluan. Bose bik hi chhungkaw thil vangin squad-ah hian a awm zui thei lo hrim hrim nia sawi a ni bawk.
India legend Sunil Chhetri chuan Kuwait lakah khan ram tana a match hnuhnung ber a khel a, Kuwait laka player 27 kha tunah chuan player 23 an ni.