Euro 2024: England inbuatsaihna a ṭha lo!

European Championship 2024 khelh a hnai a, champion tura rin kai zinga mi England inbuatsaihna a ṭha tawk lo - Euro khelh hmaa an match hnuhnung berah Iceland chu Zirtawpni zan khan 1-0 in an ngam lo.

Iceland tan Jon Dagur Thorsteinsson chuan minute 12-naah inkhela goal awmchhun a khung a, Wembley Stadium-a inkhel ni mah se, Three Lions lamin a chhanletna tur an nei lo a, an tlawm.

June 15, Pathianni zan dar 12:30-ah England hian Serbia nen Euro 2024-a an match hmasa ber an khel tawh dawn a, Gareth Southgate-a naute tan Iceland laka tlawm hi result ṭha a ni mawlh lo!

A awlsam

Southgate-a'n 3-0 a Bosnia-Herzegovina an hneh ṭum team aṭangin player a siksawi nual a, Euro 2024 atan player-te a la enchhin zel - si ban nghakah pawh Jordan Pickford aiah Aaron Ramsdale hman a ni a, mahse, a tifuh lo!

Wembley Stadium-a thawm bengchheng karah mikhual Iceland-in goal an khung hmasa a, minute 12-na lekah Thorsteinsson chuan English fan-te ngawihtir nan goal a khung.

Three Lions tlarhnungin an hna an tlin lo a, Ramsdale-a'n a hna a thawk ṭha tawk lo bawk. A tawi zawnga sawi chuan England-in si phurh an phu a, Wembley Stadium-ah chak phu zawk an chak.

Thawnthu hlui

Euro 2016-ah khan round of 16-ah England hian Iceland hi an lo ngam lo tawh a, mualpho takin an tla. Mahni ram ngeiah Iceland hmachhawnna hun ṭha an nei a, Three Lions-in an hun ṭha neih chhawr loin an khawhral.

England tan captain Harry Kane-a'n chance nei mah se, Bayern Munich striker hian a chance neih a chhawr ṭangkai lo a, Chelsea player chhuanvawr Cole Palmer-a'n a hun duhawm hming chher nan a hmang thei lo bawk.

Minute 90 chhungin England tlarhnung a nghing reng tiin a sawi theih a, champion tum nen a inhmeh lo. Euro 2024 khel phak lo Iceland hi an vanneih zan ni se, Wembley Stadium-ah goal tam zawk khung thei an ni.

Enchhinna

Southgate-a'n 4-2-3-1 formation hmangin team a rem a, Euro-ah pawh he formation tho hi a hman a rinawm. Ramsdale-a'n si ban nghakin, a hmaah Kyle Walker, John Stones, Marc Guéhi leh Kieran Trippier te an ding.

Euro-ah chuan Ramsdale aiah Pickford a luh a rinawm a, tlarhnung dang hi Iceland laka a rem dan anga a rem dawn a nih chuan an insiamṭhat a ṭul ang! Chutihrual chuan Stones hi hliam vanga lakchhuah a ngai a, hliam vanga Harry Maguire an hruai theih loh bawk avangin Stones tal hi a dam ṭhat a ṭul.

Stones hian Euro bul a ṭan thei lo a nih chuan Aston Villa defender Ezri Konsa chu a hmun ruak luah tur a nih a rinawm a, Liverpool defender Joe Gomez a la awm bawk.

Midfield hi

Southgate-a'n defensive midfield-ah Manchester United rawlthar ṭhangduang Kobbie Mainoo leh Arsenal thiampuipa Declan Rice a dintir a, Rice hian Euro-ah pawh hmun nghet a chan a rinawm laiin, a dinpui turah hian Mainoo leh Trent Alexander-Arnold te buk an ni ang.

Tlarhmaah Harry Kane maltlatin, hei chu thlak danglam a ni lo ang tih a chiang a, a hnunga ding pathum Cole Palmer, Phil Foden leh Anthony Gordon te erawh thlak danglam an ni dawn chiang.

Iceland laka number 10 mawhphurhna latu Foden a hlawhchham a, chuti a nih chuan mual vei lam sirah a tawlh phei ang a, a laiah Jude Bellingham a awm ang. Ding lama chhawr Cole Palmer nge Arsenal forward Bukayo Saka lut zawk ang, tih pawh chhan thiam a la harsa hle.

Hey Jude

Jude Bellingham-a'n Real Madrid-ah La Liga leh Champions League nomawi a chawi a, La Liga Player of the Season-a thlan a nih bakah, CL-ah pawh Young Player of the Season atan thlan a ni - a lakah England fan-ten beiseina an nei sang.

Mahse, Champions League final khel chau Bellingham hi Euro hma match hnihah a la inlan ve lo a, Southgate chuan, "Jude hian kan squad min tichak dawn tih chu thil chiangsa a ni a, mahse, hei hi ama mawhphurhna vek a ni bik lo.

"Pressure a zo ang tih hi chu ka chiang sa, mahse, a kuta engkim kan dah erawh a rem lo. Player ṭha dang tam tak kan kawl nual a, Euro nomawi chawi tur chuan kan vaia thawhhona a pawimawh ber. Player ṭha tak, rilru paukhauh a ni a, team chu min chawikang ngei ang," a ti a, Bellingham a fak.

Player dang

Palmer-a'n England tana a match lina a khel a, Chelsea tana mimal season duhawm tak hmangtu hi Southgate chuan a fak bawk. English coach chuan, "Season duhawm tak a hmang a, kan inkhel kha en ila, goal khungna chance a lo insiam zung zung zel.

"A chance neihah duh aiin ball erawh a khawih tam hretin ka hria. Chutihrual chuan hun ṭha a insiam a, kan khingpui tan a hlauhawm em em," a ti a, kum 22 mi attacking midfielder tan thu hriat nuam a tling ang.

Hetihlai hian Saka pawh minute 65-naah a lut a, England training tam zawka a inlan hman lo chunga khelmual a lut hi lawmna tur a ni. Southgate chuan, "Khelmuala Bukayo a lut ve ta pawh ka lawm khawp mai - kan zingah training a nei mumal lo a, a inkhelh a ngai a ni," tiin Euro khel tura an inpeih vek a ṭul thu a sawi.