MFA-in 2024-25 Season Calendar tichhuak

Mizoram Football Association-in 2024-25 Season Calendar a ti chhuak a, ruahman chinah chuan veng/khua inelna dah tel a ni lo. AIFF Calendar a zirin MFA chuan an ruahmanna siam hi thlak danglam theih a nih thu an puang tel bawk.

MPL11 : Mizorama football inelna sang ber July 9, 2024-ah khelh ṭan a ni ang a, October 11, 2024-ah khelh zawh a ni dawn. Ṭum danga December thlaa final khelh ṭhin kha Santosh Trophy leh National Games vangin khelh zawh hma a ni ang.

I Day Football : Independence Day puala kum tina neih ṭhin I Day Football neih a ni dawn a; MPL club bakah hmeichhia leh veteran inelna buatsaih a ni ang. I Day Football khelh chhung hian MPL11 chu chawlh rih tur a ni.

MFA U20 League : Kum 20 hnuai lam tan MFA-in league a siam dawn a, MPL11 zawhah khelh tur niin November 25 - December 20, 2024 chhungin Aizawlah khelh a ni ang.

Inter Dist Women's C'ship: 2024-25 Season Inter Dist Women's C'ship chu Saitualin an thleng dawn a, November 25 - December 14, 2024 chhunga khelh tur a ni. Aizawl District chu champion lai an ni a, inelna thlengtu Saitual District hi pahnihna ni lai an ni thung.

MPL Under 17: January 13 - February 7, 2025 chhungin MPL Under 17 khelh a ni dawn. Inelna hnuhnung berah Aizawl FC chuan Chanmari FC hnehin an champion.

MFA Cup: February 10-28, 2025 chhungin Champhaiin MFA Cup an thleng ang. Lawngtlaiah inelna hnuhnung ber khelh a ni a, a thlengtu Lawngtlai club MLS an champion.

Women's League: MFA Women's League chu March 3-29, 2025-ah khelh tur a ni a, Lalsangzuala Hmar enkawl Mizo Football News chu champion lai an ni.

Inter Dist Junior Boys C'ship: Serchhip-ah Inter Dist Junior Boys C'ship khelh a ni dawn a, March 15 - April 6, 2025 chhungin khelh a ni ang.

MFA U15 League: MFA-in hun rei tak a buatsaih loh hnuah Under 15 League a buatsaih leh dawn a, April 10 - May 17, 2025 chhungin khelh a ni ang.