Euro C'ship ṭan hmain Germany an chak

Germany-in Euro C'ship an khelh hma friendly match hnuhnung berah Greece 2-1 in an hneh. Borussia-Park-a inkhelah Giorgos Masouras hmangin Greece-in khung hmasa mah se Germany-in Kai Havertz leh Pascal Gross te hmangin an sut.

Julian Nagelsmann-a'n captain atan Ilkay Gundogan hmang mah se goalkeeper-ah Manuel Neuer a rin ber a la ni a, Bayern Munich keeper hian inkhelh ṭantir lamah save ṭha bik nei mah se a tihsual vangin Greece-in an khung.

Greek midfielder Christos Tzolis ball pet chu harsa lo taka man theih ni mah se Neuer-a'n a tiper a, Masouras-a'n a khung. Neuer hian tisual mah se Euro C'ship-ah rin a ni dawn tho a, Barcelona goalkeeper Marc-André ter Stegen erawh bench-a awm turin a rilru a insiam a ngai thung ang.

Germany hian tun hma angin out and out striker langsar an nei tawh lo a, no. 9 ha tur Niclas Fulkrug hi striker chu ni ngei mah se 'world class striker' a chhiar a la harsa. Nagelsmann pawhin Fulkrug aiin Arsenal tana season hmang ṭha Kai Havertz bul a ṭantir a rinawm zawk a, ani erawh attacking midfielder ni ṭhin forward atana siam chawp a ni. Chutihrualin Havertz hi UCL final meuha goal khung tawh a ni a, Greece lakah pawh si phurh sutna goal a khung.

Greece-in Germany tlarhnung a tibuai fo a, mah se a tawpah erawh player nei langsar zawkin hnehna an chang. Germany tana chakna goal khungtu erawh player langsar ber ni loin Brighton tana khel Gross a ni a, kum 32 mi German midfielder hian ram tana vawi sarih a khelhnaah a goal hmasa ber a khung a, box pawn aṭanga a volley goal mawi zet chu chakna goal a ni.

Germany hi group A-ah Scotland, Hungary leh Switzerland te nen an awm a, June 14, Zirtawpni zan dar 12:30 hian opening match-ah Scotland nen an inkhel ang. Julian Nagelsmann-a'n Euro khel tur a tifel tawh a, player 27 a koh aṭangin goalkeeper Alexander Nubel a paih. Euro 2024-ah hian squad-ah player 26 an awm thei a ni.