July 9 aṭangin MPL11

Mizoram Football Association leh Zonet ten kum 10 chhung thawk dunin Mizoram Premier League an buatsaih tawh a, an inremna chu kum khata pawt seiin July 9, Thawhlehni aṭangin MPL11 khelh ṭan a ni dawn.

MPL Board chuan AIFF Calendar thlir tel chungin ruahmanna an siam a, Santosh Trophy leh National Games khelh hmaa zawhfel tum a nih avangin October thlatirah MPL11 hi khelh zawh tum a ni.

MPL11-ah hian team pariat an awm dawn a, chungte chu Aizawl FC, Chanmari FC, Chawnpui FC, Electric Veng FC, FC Bethlehem, Mizoram Police FC, Ramhlun Athletic FC leh SYS FC te an ni. MPL Qualifier hmangin MPL-ah FC Bethlehem an kir a, SYS FC-in playoff-ah MPL10 pasarihna Project Veng FC hnehin MPL11 an khel dawn.

MPL6 champion Chhinga Veng FC an tel dawWn tawh lo. Season liam ta khan semifinal lut mah se club neitu thar an nei a, Ramhlun Athletic FC-ah a hming hi thlak a ni.

MPL ṭan nan thla khat chauh a awm tawh avangin tualchhung transfer bazar a lun nghal hle. Season liam taa MPL player ṭha engemaw zatin phai club an zawm a, MPL11-ah player thar an awm nual turah a ngaih theih.