England leh New Zealand dinmun a ṭha lo

T20 Cricket World Cup-ah champion lai England-in ODI World Cup leh World Test Championship champion lai Australia an hneh lo a, Three Lions hian match hnih khelh tawhah chak hmel an la hmu lo. Chutihrualin Three Lions hian Namibia leh Oman te an sawp theih chuan Super 8 luhna kawng zau tak a inhawng.

New Zealand pawh vawi khat chauh la khel mah se an elpui Afghanistan an hneh lo a, June 13, Ninganiah a thlengtu West Indies an hmachhawn lehnghal dawn. Black Caps hian Windies hi an hneh lo a nih chuan match hnih lekah Super 8 luhna kawng kharsak theih an ni.

Champion lai chu

England-in champion nawn ngei tumin Barbados an pan a, match hmasa berah ruahsur vangin Scotland nen an inhnehtawk. Match hnihnaah World Cup-a record nei ṭha ber Australia an hmachhawn a, England-in an ngam lo.

Tun ṭum inelnaah hian batter aiin bowler-te an langsar zawk a, IPL khelh zawh taka 200 runs an vaw kai deuh reng ang kha a ni tawh lo. 150 runs pawh target ṭha a ni a, Australia hian 201/7 runs siamin tun ṭum inelnaa 200 runs vaw kai hmasa ber an ni.

Aussies player-te an khel ṭha rual a; David Warner (39), Mitchell Marsh (35) leh Travis Head (34) ten 30 runs an vaw tling vek. England tan target a sang a, an beidawng bik lo. Opener pahnih Phil Salt (37) leh Jos Buttler (42) ten bul ṭan ṭha mah se Pat Cummins (23/2) leh Adam Zampa (28/2) te ngam loin over 20-ah 165/6 runs chauh an siam.

Group B aṭangin Australia-in Super 8 an tling mai dawn a, hmun ruak dang pakhat hi Scotland leh England ten an inchuh ang. Three Lions tan group stage paltlang loh hi mualphona a ni.

Black Caps an chesual

Providence Stadium, Guyana-ah New Zealand-in June 8, Inrinni zing khan an match hmasa ber an khel a, Afghanistan lakah 84 runs zetin an chak lo. Ṭhumvawrah Black Caps an vannei a, vawm hmasak an thlang.

Afghanistan opener Rahmanullah Gurbaz (80) leh Ibrahim Zadran (44) ten bul an ṭan a, powerplay-ah wicket hloh loin 44 runs an siam. Gurbaz-a chet ṭha zarah Afghanistan-in 159/6 runs an siam a, tun ṭum inelnaah chuan target chhia a ni lo.

New Zealand bat hun a thleng a, top order-ten run tam an siam lo. Finn Allen (0), Devon Conway (8), Kane Williamson (9) leh Daryl Mitchell (5) ten 10 runs an siam tling lo vek a, a che ṭha ber Glenn Phillips pawhin 18 runs chauh a siam. Black Caps hian over 20 pawh an daih lo a, 15.2 overs-ah 75 runs chauh siamin an thi vek. A tawi zawng chuan Gurbaz-a run siam zat pawh an pha lo!