Man City-ah Ortega a nghet

Manchester City goalkeeper Stefan Ortega chuan kum khat daih contract a ziak thar a, kum 2025-26 season tawp thleng Etihad Stadium-ah hun a hmang chhunzawm dawn tihna a ni.

Kum 31 mi Ortega hian kum 2022 khan German club Arminia Bielefeld aṭangin Man City hi a zawm a, season hmasa khan Premier League match vawi kua khelin FA Cup final an khelh ṭumin inkhel bul a ṭan bawk.

Ortega chuan, "Manchester City tana hun rei zawk ka khel thei tur hi ka lawm. He club hian player ten kan mamawh tur ang zawng zawng chu min pe a, nitin mai hian hmasawn leh zual tumin theihtawp kan chhuah.

"Goal ven kawngah pawh a tir ni hmasa ber aṭanga vawiin thlengin kawng hrang hrangin hma ka la sawn belh zel," a ti, a contract hmasa hi 2024-25 season zawh ruala zo tur kha a ni.

Man City hian Ederson an neih avangin Ortega tan inkhelhna hmun a tam lo - a nihna takah chuan Premier League bikah phei chuan Brazilian goalkeeper a khelh theih loh chang a khel tur chauh a ni.

City director of football Txiki Begiristain chuan, "Ortega hi khawvela goalkeeper number 2 zingah chuan a ṭha ber," a ti a, amah Ortega pawhin a khelhna club tan hian number 1 a ni phak lo tih a pawm.