Brazil chak puitu Endrick

World champion vawi nga ni tawh Brazil tana khel phak nih a harsa a, player langsar bik nih phei chu thil awlsam lo tak a ni - kum 17 mi chauh Endrick chuan Brazil a chakpui.

Copa America inbuatsaih nan nimin zing khan Brazil hian Mexico nen friendly match an khel a, inkhel hmuhnawm takah Brazil hi 3-2 in an chak hram a, hun tawp dawna goal lutin sawi zui a hlawh.

Brazil hian Andreas Pereira leh Gabriel Martinelli te hmangin goal an nei hmasa a, chak nuamsa tura ngaih an nih laiin Mexico lamin Julian Quinones leh Guillermo Martinez Ayala te hmangin an sut.

Mexico goal hnihna hi minute 90+2-a lut a ni a, hun a tawp teuh tawh hle. Mahse, hamrik hnuhnung rik hma hretin substitute Vinicius Jr siamsak chu Endrick hian a khung.

Chakna goal khungtu Endrick chuan, "Pathian zarah kan ram tana khelhna hun ka nei leh a, goal khung theihna remchang ka hmuh avangin ka lawm bawk, result ṭha nei tur hian kan training ngawrh em em a ni.

"Copa America ṭha taka khelh kan tum a, chumi atana inbuatsaihna kan neih ṭhat theih avangin a lawmawm bawk," a ti. Inbuatsaihna dang atan United States nen an la inkhel leh ang.

Copa American vawi kua champion tawh Brazil hi inelna takah chuan group match-ah Costa Rica, Paraguay leh Colombia te an hmachhawn dawn a ni.

Endrick hi 5ft 8in-a sang niin Brazil coach Dorival Júnior chuan ram tana khel turin a ringtawk a, a kum enin la nau deuh mah se theihna a neih san miau avangin player ṭha tam tak zinga thlan a ni.

Brazilian club Palmeiras tan match 66 aṭangin goal 18 a khungsak a, kum bithliah inelna lamah chuan Brzail tan a inlan tawh ṭhin, senior team tan match vawi nga khelin goal thum a khung ta bawk.

Player ṭha leh an mit it zawng apiang la khawm mai ṭhin Real Madrid chuan nikum December thla khan inremna an lo neih puih leh daih tawh a, tun nipui bazar inhawn hunah an lalut ang.

Brazilian player ṭhenkhat ang bawkin Endrick hi Real Madrid tana khelh châk a ni. Endrick chuan, "Real Madrid tana thawnthu ka ziak ve thei tur leh, ka nuna a bet ve tur hi ka lawm," tiin a lo sawi tawh a ni.