Pakistan beiseina tichhetu India

T20 World Cup-a inkhel ngaihven hlawh berah India-in (119) run rukin Pakistan (113/7) an hneh. Shaheens hi group stage paltlang lo a, tla nghal thei dinhmunah an ding.

Pathianni zan khan ruahsur vangin New York-ah inkhel hun sawn tlai ni mah se inkhel ngaihven hlawh hi beisei ang ngeiin a hmuhnawm.

Pitch a danglam bakah ruahsur vangin ṭhumvawr a pawimawh lehzual a, a vannei zawk Pakistan-in vawm hmasak an thlang. India captain Rohit Sharma pawhin vawm hmasak chu, a thlan ve tho tur a nih thu a sawi.

Rohit Sharma (13) leh Virat Kohli (4) ten run tam an siam lo a, Rishabh Pant (42) leh Azar Patel (20) te zarah India-in bul an ṭan chhe lo. Pant hi a vannei tel a, ṭhum thum ngawt 'out' theihna tur nei mah se Itfikhar Ahmed, Usman Khan leh Imad Wasim ten an man lo vek.

India-in over 11ah 89/3 runs siam thei mah se Patel-a out hnuah an talbuai. Over tawp lam pariatah aṭangin 30 runs siamin wicket riat an hloh. Over 20 pawh an dam tling thei lo a, over 19-ah 119 chauh an siam.

Mohammed Rizwan (31) leh Babar Azam (13) te bul an ṭan ṭha a, Shivam Dube-a'n Rizwan-a ball vuak a thlauh hnu phei chuan India dinhmun a chhe lehzual. Win predictor-ah pawh Pakistan chakna chance chu 92% a ni hial!

Mahse, Rohit Sharma-a'n captain hna ṭha takin a thawk a, bowler ṭha ber Jasprit Bumrah hman hun a hria. Bumrah pawhin a tih tur ti ve bawkin wicket pawimawh bik a lak bakah over liah 14 runs chauh a pe. Wicketkeeper Pant a hmuhnawm a, batting leh fielding-a hna ṭha tak a thawh avangin man of the match-a thlan Bumrah ang thoin khel ṭha bera thlan a phu. A tawpah India-in team ṭha zawk an ni tih an nemnghet a, Pakistan-in risk an la tlai bawk nen over 20-ah 113/7 chauh an siam a, run riatin India run siam zat an pha lo.

Pakistan hi an khelh hmabakah chak vek pawh ni se, USA-in Canada leh Ireland te an hneh chuan an tla tho dawn. Hei vang hian Shaheens tan tun ṭum inelnaah beisei tur an nei tlem tawh hle.