June 13-14, 2024-ah Mizoram Sports Conclave; College leh Univ zirlai, sikul zirtirtute kal se kan ti - Sports Minister

Sports & Youth Service (SYS) department chuan Mizoram Sports Conclave - Preparing Mizoram for Olympic Games, 2036 chu June 13-14, 2024 hian Baptist Centre, Falkland Vengah an buatsaih dawn. National level sport intawhkhawmna hi sorkar laipui aṭanga sum hmuh aṭanga buatsaih tur a ni.

Mizoram Sports Conclave hi Olympics 2036-a Mizo infiammi tam thei ang ber an tel ve phak theihna tura inbuatsaihna hmasa a ni a. Mizoram sports minister Lalnghinglova Hmar chuan infiamna lama tui College leh University zirlaite bakah zirtirtute kal tam se a tih thu Vanglaini a hrilh.

"National level inrawn khawmna a ni a, kan zirlaite tan pawh inzirna ṭha a ni. Zirtirtute pawh tel se, an zirlaite pawh hrilh chhawng se a ṭha ang," a ti a; a duh tan registration tia inziah luh theih a nih thu a sawi.

Olympics 2036 chu

Olympic hi kum li dana neih ṭhin a ni a, kuminah pawh July 26 - August 11, 2024 hian Paris-ah neih a ni dawn. Inelna neihna tur hmun hi puan lawk ṭhin a ni a, kum 2028 thleng tur chu Los Angeles niin Brisbane-ah Olympic 2032 nghah a ni bawk ang.

Kum 2036 thlengtu tur thlan fel a la ni lo. October 14, 2023-a International Olympic Committee (IOC) session-ah prime minister Narendra Modi chuan India-in Olympics 2036 thlen a tum thu a sawi.

India hi khawvela economy lian ber pakhat a ni tawh a, Olympic thleng thei khawpa ṭha sports infrastructure leh facility siam a harsat lo ang. Ahmedabad-a cricket stadium Narendra Modi Stadium hi khawvela stadium lian ber niin entu 132,000 a leng.

Chutihrualin infrastructure leh facility a tawk lo a, ṭha taka inel tur infiammi ṭha neih tel a ṭul. Infiammite hmasawn pawimawhzia hriain Sports Minister leh Sports & Youth Services Department ten National level sport intawhkhawmna buatsaih a ṭul an ti a, central sorkar aṭangin a buatsaihna tur sum an sawi chhuak.

'Mizoram Sports Conclave – Preparing Mizoram for Olympic Games, 2036’ atan hian Human Resources Development in Sports (HRDS) aṭangin Rs. 68,80,500 hmuh a ni.

A tel tur an hraw

Mizoram Sports Conclave-ah hian Mizoram chief minister Lalduhoma leh sports minister Lalnghinglova Hmar bakah Meghalaya sports minister Shakliar Warjri, Manipur sports minister Govindas Konthoujam leh Assam sports minister Nandita Garlosa te chu thusawi tur zingah an tel.

Heng bakah hian SAI director general Sandip Pradhan, Ministry of Youth Affairs and Sports Secretary Sujata Chaturvedi, Reliance foundation sports head Siddarth Shanker, Tata Steel chief of sports Mukul Choudhari, Inspire Institute of Sport CEO Rushdee Warley leh Tata Truts head of sports Neelam Babardesai te pawh an tel.

India ram pum huapa Sports Association hruaitu lian Indian Olympic Association joint secretary leh AIFF president Kalyan Chaubey, Wrestling Federation of India vice president Asit Kumar Saha, Hockey India general secretary Bhola Nath Singh, Indian Weightlifting Federation president Sahdev Yadav, Boxing Federation of India general secretary Hemanta Kumar Kalita leh Table Tennis Federation of India secretary general Kamlesh Navichandra Mehta te pawh lo kal tura beisei an ni.

National media aṭangin Indian Express Sr. Ast. Editor Mihir Vasavda leh Sportstar editor Ayon Sengupta te tel thei tura ngaih an ni bawk.

Hun ṭha chu

Mizoramin khual ṭha ṭhahnem tak a thleng dawn. AIFF president Kalyan Chaubey-a'n Mizoram a rawn tlawh hmasak khan, amah ringawt hi Mizoram football tan chuan chanchin lawmawm a ni. Tun ṭumah erawh Chaubey hi khual ṭha pakhat zinga mi a ni tawh a, an rawn kal tur zozai thlir hian Mizoram Sports Conclave hi Mizoram infiamna tan rahbi pawimawh a ni.

Mizoram sports minister Lalnghinglova Hmar chuan, "Olympics 2036 kan thlir chuan kum naupang zawk aṭangin kan ṭan a ṭul a, chung naupangte hrilhfiah thei turten Mizoram Sports Conclave an ngaihhlut hi a pawimawh.

"College leh University zirlaite infiamna lama tuite, National level sport intawhkhawmna chhim tur hian inziaklut se. Naupang hmabak nei êng tak tak enkawltu school zirtituten kan intawhkhawmna buatsaih hi ngai pawimawh se, ngai hlu se, tih hi kan duhthusam a ni," tiin Vanglaini a hrilh.

Sports Conclave hi Olympic Games-a Mizoramin medal an hlawhchhuah theihna tura inbuatsaihna a nih angin, Mizoten medal an lak beiseiawm deuhna sports discipline te thlurbing a ni dawn. Olympic 2035 tin zawn a nih avangin hemi huna rilru leh taksa vanglai hmang chho tur, tuna kum 8 leh 15 inkarte sports-a an hmasawnna tur ngaih pawimawh a ni dawn.

Inziahluh dan

Mizoram Sports Conclave pual hian website https://www.mizoramsportsconcl... siam a ni a, hemi kaltlang hian in register theih a ni a; thil harsa a awm lo. Hming, email leh phone number te chhut lut a, inziahluh mai theih a ni.

National level sport intawh-khawmnaah hian sawm bik an awm lo a, Infiamna lama tui, Mizoramin infiamnaa hma a sawn theihna tura ngaihtuah seng ṭhin tan chuan Mizoram Sports Conclave-ah hian tel ngei chi a ni ang.