Project Big Picture: Premier League thlak danglam tumna chu!

Liverpool leh Manchester United kaihhruaina hnuaia English football kalphung thlak danglam tumna chu Premier League chuan an thlawp loh thu an sawi a, "A ṭha lo lam zawngin nghawng a neih zawk a hlauhawm a ni," an ti. 

Project Big Picture hnuaia ruahmanna langsarah chuan Premier League a inlan club 20 chu 18-ah tihhniam a ni dawn a, Championship, League One leh League Two-in club 24 ṭheuh an nei thung ang.

Mahse, Premier League chuan thuchhuah siamin, "English football hi khawvela en hlawh ber pawl a ni a, a kalphung leh inelna avang hian khawvel hmun hrang hrangah ngaihven a hlawh hle. 

"English football-in he dinhmun a chelh chhunzawm zel theihna tur chu kan vaia kan thawh tlan a ngai a ni," an ti a, club ṭhenkhat duh dan ang maia league chu kal thei a nih loh thu an sawi. 

Premier League club chu 18-ah tih tlem an ni ang a, a hniam pahnih hi an relegate nghal ang - a hnuai lam pathumna chuan Championship playoff a khel thung ang a, season thara Premier League khelh chhunzawm thgeihna chance an nei ang. 

League Cup leh Community Shield chu tihtawp tur a ni a, Premier League-in English Football League (Championship hnuai lam league zawng khaikhawmtu) beisei angin Covid-19 vanga an harsatna sutkian nan pound maktaduai 250 a pe ang. 

Premier League chuan kumtin a sum hmuh aṭanga 25% chu EFL hnenah an pe tur a ni a, mahse English top flight aṭanga relegate te puih ṭhin nana ruahman, kum thum chhung an pek ṭhin 'parachute payment' chu tihtawp tur a ni thung. 

Club pakua, Big Six huang chhunga mi Liverpool, Manchester City, Manchester United, Chelsea, Arsenal leh Tottenham Hotspur bakah Southampton, West Ham leh Everton-te chuan thutlukna ṭhenkhatah thu an nei ang. 

He ruahmanna hi Liverpool neitu Fenway Sports Group-in an kalpui hmasak ber a ni a, United co-chairman  Joel Glazer chuan lo enfiah ve lehin a bawhzui - club pahnih hian Arsenal, Chelsea, Manchester City leh Tottenham Hotspur thlawpna hmuh an inbeisei bawk. 

Mahse, khawthlang media ten an tarlan dan chuan club zingah he ruahmanna duh lo hi an awm nual a, Spurs chuan Liverpool leh United hi thlawp mah se Chelsea, Arsenal leh City-in an thlawpna an la ti lang duh lo a, Premier League club dang zawng chuan an thlawp lo tawp.

Project Big Picture kalpui chhan ber nia lang chu English top flight club leh EFL club inkara sum dawn intam hleih lutuk chu a ni a, hei vang hian Premier League sum lakluh 25% chu kumtin EFL-ah pek ve tura rel a ni reng a ni. 

A tir berah chuan coronavirus buaina avangin EFL club-te hi pound maktaduai 250 pek an ni ang a, England a football thuneitu sang ber Football Association chuan 'lawmman' atan pound maktaduai 100 an dawng bawk ang. 

Football Supporters' Association chuan, "Club neitu sumdawng hausa tak takte chuan football kalphunga thutlukna lian tak chu kan hriat lohin siam an tum niin a lang a, heng mite hian football chu an lalna tual ang maia chantir an tum a ni. 

"Football hi sumdawnna aia chungnung zawk, kan nunphung leh kan kalphung a ni a, kan thisena bet tlat a ni," an ti a, Project Big Picture kalpui a nih dan chu an duh loh thu an sawi. 

UK sorkar hnuaia Department for Culture, Media and Sport thupuangtu chuan, "Hun harsa taka club tenau zawkte pui tur nia kan ngaih laia a chung lama awm ten an duh dana thil an tikual mai mai nia ngaih theiha thil awm hi mak kan ti takzet," a ti. 

Premier League chuan, "Football-ah hian mi inhnamhnawih an tam tam em em a, chuvang chuan he project pawh hi dan pangngai takin club leh football a inhnamhnawih tam takte tel ve theihna turin ruahman tur a ni," an ti ve bawk. 

English Football League hotupa Rick Parry chuan Liverpool leh Manchester United ruahmanna hi a thlawp thu a sawi tawh a, a thlawp hi thil awm lo a ni hran lo - EFL-in pound maktaduai 250 an dawng dawn tlat. 

BBC sports editor Dan Roan chuan, "England a club lian ber pahnihin an ruahman a nih avangin en liam mai theih a ni lo a, ngaihthah a thiang lo. Premier League sum lakluh aṭanga 25% hi EFL ten an insem ṭhin dawn avangin thlawptu pawh an ngah ang," tiin a sawi. 

Hetihrual hian Big Six zawngin he ruahmanna hi lo thlawp ta pawh ni se Premier League club dang 14 tan chuan club liansate thuneihna pek belhna angin a lang thei a, thlawp a harsa khawp ang. 

Tun dinhmuna a lan dan chuan EFL lamin he ruahmanna hi an thlawp a, sorkar, Premier League leh fans lam an ṭangkawp niin a lang thung - Premier League hma hun a chiang lo.