Celtics an chak zawn

Jrue Holiday chet ṭhat tukah Boston Celtics chuan Dallas Mavericks chu 105-98 in an hneh - NBA Finals khelh laiah Celtics hian 2-0 in best of seven series chu hma an hruai mek a ni.

Nimin zing TD Garden-a inkhelah Holiday hian point 26 a neih bakah Jayson Tatum chuan point 18 a nei a - Tatum hian assist vawi 12 neiin rebound vawi kua a la bawk.

Boston Celtics chak puitu Holiday-a chuan, "Tatum kianga khelh hi a nuam ṭhin, ani hi chuan a kianga khelte hi player ṭha zawkah min chhuah. Hun harsa laiah a chinfel dan a hria a, a zarah kan hming a mawi ve ṭhin," tiin a khelh pui a fak thiam hle.

June 13, Ningani zing dar 6:00 hian American Airlines Center-ah game 3 an khel leh ang. Match hmasa pahniha an chak loh hnuin Dallas Mavericks chuan anmahni mualah ngei hnehna chan tumin an bei dawn a, inkhel a hmuhnawm ang.

Luka Doncic-a'n Dallas Mavericks tan point 32 ngawt neiin assist leh rebound 11 ve ve nen triple-double nei mah se hnehna chan nan a tawk zo lo a, anmahni khelmualah erawh chuan chak ngei turin a ṭhiante puihna a mamawh zual dawn.

Slovenian star Doncic chuan, "Kan shot tam tawk lo, chuvangin point pawh kan nei tam lo. Ball hloh vanga min hrem letna leh free throw ka tihsualte kha a pawi ka ti a, match lehpekah chuan tihsual neih tlem lehzual ka tum ang," tiin a sawi.

Mavericks hian Doncic bakah Kyrie Irving an nei bawk, point 16 neitu Irving hian tawnhriat a nei ṭha tawh a, a vawi hnih nana NBA champion nih an tumna kawngah a che fuh a nih chuan danglamna siam thei tur a ni ve bawk.