Thih leh dam kara leng India

Sunil Chhetri a chawl tawh a, Indian footballer piang tawh zinga ropui ber ang hiala tam takin an ngaih, Bengaluru forward tel loin India chu zanin hian an inlan dawn - dar 9:15-ah Qatar an lenchilh ang.

Team pahnih inhma-chhawnna tur hi FIFA World Cup Qualifier second round a ni a, Blue Tigers tan third round lut turin tlawm a thiang tawh lo - an kutah engkim a la innghat a, mahse, a harsa dawn thung!

India hian Qatar an hneh a nih chuan third round an lut ang. Qatar nen an inhnehtawk a nih erawh chuan zanin dar 11:15-a Kuwait leh Afghanistan inkhelah chak zawk an awm loh a ngai.

Lallianzuala Chhangte chuan, "Kha leh chen hun ṭha kan bawhpelh tawh a, tun ṭum chu chak ngei ngei a ngai ta - tun bak chance kan nei tawh lo," tiin Vanglaini a hrilh a, hnehna chan ngei a duh. India squad-ah hian Lza bakah Edmund Lalrindika leh David Lalhlansanga te an awm.

A pawi zo ta

Lianzuala sawi angin India hi awlsam taka third round lut thei an ni a, mahse, an chance neih an bawhpelh. Blue Tigers hian match hmasa berah team ṭha Kuwait chu 1-0 in an hneh a, khualmuala chak an nih bawk avangin an lakah beiseina a sang hle.

India-in an match hnihnaah Qatar chu 3-0 in an ngam lo zui a, team pahnih dinhmun thlirin result awm tak a ni, tiin a sawi theih. Mahse, India hian point ruk hmuhna tura ngaih Afghanistan lak aṭangin point khat chiah an hlawh chhuak a, fans an lungawi lo.

Afghanistan laka 1-2 a an tlawm ṭumin Guwahati-ah an inkhel a, coach Igor Stimac chu bang turin fan-ten an au hial! Croatian coach hi team bus a luh thlengin auh el a ni a, fan-te an lungawi tawh lo takzet.

"Kuwait lakah tal" tiin beiseina nen India fan-ten an thlir a, mahse, ram tana a vanglai hun zawng zawng hlantu Sunil Chhetri thlahna inkhelah meuh pawh India an chak zo chuang lo a, team ṭha ber Qatar lakah chak ngei ngei a ṭul phah.

Vanneihna?

India-in anmahni kalkawng an kit hnawk a ni ber a, mahse, vanneihnain an lam a ṭang ve tlat - zanina an hmachhawn tur Qatar hian third round an lut chiang tawh a, hei vang hian coach Tintín Marquez chuan ram tana la inlan ngai lo player a ko nual.

Bengaluru coach hlui Ashley Westwood enkawl Afghanistan chuan Qatar hi 0-0 in an inhnehtawkpui a, Qatar player zingah ram tana a vawi khat nana inlan an awm nual - Afghan laka a vawi khat nana inlante chhiar tel lohin, player pakua chu ram tana la inlan lo an ni!

Qatar player-ten tawnhriat an nei tam lo a, Asia ang pawha player langsar ni phak Almoez Ali leh Akram Afif te tel lohna Qatar hmachhawn a awlsam sawt dawn a, India tan point thum hmuh chance a awm.

Chutihrual chuan an inkhelhna tur hmun hi Qatar a ni a, a awlsam dawn lo. Lianzuala chuan, "A awlsam dawn lo, mahse, hneh theihna chance kan nei - player naupang rual an ni dawn a, chak ngei tumin kan khel dawn," tiin Vanglaini a hrilh.

India - engtin nge?

Sunil Chhetri a chawl a, tu nge captain ni ang? tih zawhna a awm laiin, Gurpreet Singh Sandhu chu captain armband hreng tur a ni - Bengaluru keeper hian captain hmun a luah nghet ang tihna erawh a la ni lo a, zanin match bik atan captain-ah ruat a ni.

Chuti a nih chuan GSS-a'n si ban nghakin, a hmaah Nikhil Poojary, Rahul Bheke, Anwar Ali leh Jay Gupta te inkawp leh tura ngaih an ni a, defensive midfield-ah Jeakson Singh leh Suresh Singh an inkawp a nih pawhin a mak lo ang - Kuwait laka beisei phak lo Anirudh Thapa a la awm bawk.

Lianzuala leh Liston Colaco chu mual sir aṭanga nawr tura an luh a rinawm a, Brandon Fernandes tan number 10-a khelhna chance a awm bawk ang - number 9-ah tu nge awm ang? tih chu zawhna a ni a, chhan a harsa.

Mumbai City-ah Vikram Partap Singh che ṭha mah se, a laiah a khel phak lo a, Manvir Singh zawk a inlan mai thei. Mahse, Mohun Bagan foward hian club-ah number 9 hna a chelh phak bik lo a, zanin India inrem dan tur hmuh a châkawm ta hle.

World Cup kalkawng

• Second round-ah hian team 36 awmin, group pakuaah team pali zel awmin ṭhen hran an ni a, group tina a sang pahnihte hian third round an lut ang.

• Third round hi group pathumah, team paruk zel awmin ṭhen an ni leh a, group tina a sang pahnihte chu World Cup khel turin an tling dawn.

• Third round-a group tina pathumna leh palina te chu fourth round-ah an intum leh dawn. Group pahnihah, team pathum ve ve awmin dah an ni ang a, group pahniha pakhatna ve ve chu World Cup khel turin an tling ang.

• Fourth round-a group pahniha pahnihnate chu double leg-in an inkhel leh ang a, a chak zawk chuan Inter-confederation playoff kaltlangin chance an nei leh dawn a ni.