Silly Point : Hollywood Blockbuster
New York lamah chuan Pathianni tuk chawhma inkhawm ṭan dar rik hun a ni a, Major League Baseball lamah, New York Mets leh Philadelphia Phillies te London Stadium, New York-ah an inkhel mek.
New York mipui nuai chuang fe chu, chu inkhel ngaihven chuan an phu mur mur tawh a. London Stadium aṭanga lirtheia darkar chanve tlan leka hnai Eishenhower Park-ah chuan India leh Pakistan te chu ICC T20 World Cup a intum turin ruah sur han nghakin an lo warm up vel mek. Mipui sing chuang tehmeuh mai an lo zi ve mur mur bawk a ni.
ICC ak pui
Cricket-in, America khawmualpui a sawi nghing dawn a nih chuan, World Cup dawhsana India leh Pakistan te chu, infiamna ngaina American ho Pathianniah ngei mai, New York khawpuiah ICC-in a nghah kha a ngai tlat.
Tin, engkim duhthusamin ruahmana siam thei mah se, a inkhel ber a "hit" dawn tih erawh ICC pawhin a sawi lawk thei bik lo. Tunhnai kum 10 vel chhung chu, India leh Pakistan hi T20 leh ODI World Cup-ah an intum fo a, mahse harsatna em em tawk loin Hamara Desh ho hi a chungnung zawka ṭang an ni deuh ziah. Tun hnai Pakistan khawsak dan lahin beisei min pe sang vak lo. USA laka tlawm hlim kha an ni tlat.
Pakistan an ṭhangharh
Ruahin hun engmawchen inkhel ṭan hun a pawhtlai hnuah, ṭhumvawra vanduai zawk India te vaw hmasa turin an lut. Over 10 thleng India-in 80 runs siamin, wicket thum chauh an la hlauh a, T20 score pangngai tak a ni dawn emaw kan ti vek.
Over 10 chawlh lailawk an ṭan leh hnuah, thawklehkhatah Pakistan bowler-te an ṭhangharh thut a, pitch a tho a ta thut bawk. Ball sawh dan a mumal lo ṭan a, New York-a, cricket khelhna atana an han phuahchawp hnuhnawh pitch chuan a zia a rawn chhuah ṭan ta.
Ball ṭumna hmun inang rengah ṭhenkhat a sawt muang siin, feet thuma sangten a sawt lawi a, a dawt chiah ball lah feet hnih leka sanga sawtin a tleng deuh zuk thung. Batsman-te tan runs siam chu sawi loh, mahni sa himna zawn tel pah a ngai ta. Run 120 lek puitlin India runs siam zat hi chak nan tawk tak maw?
Ṭen ṭen
Chawlh lailawk an hman lai hian WhatsApp message leh phone ka dawng deuh reng a. "India runs siam khi a va tlem ve, an va nep ve, tinge? an chak thei ang em," tih vel hi ka dawn hnem pawl tak a ni.
Chuta ka chhana chu a inang deuh vek: "Pitch khi duhthu a sam lo a, Pakistan khian awlsam tak chuan India khi an hneh miah lo ang," tiin. Pakistan lamah chuan buk erawh a rit deuh tih chu ka pha miah lo.
Mamawh chhanna Bumrah
Pitch ball sawt a mumal lo tih a chiang a, chutiang ang hmang ṭangkai tur chuan he khawvel ramzauvah hian Jasprit Bumrah aia thlan tur hi an awm bik chuang lo ang.
Pakistan lamin bul an ṭan chhe lo nangin, duh duhin ball a vaw chhuak thei lo tih a lang chiang telh telh.
India pacer ho vawm lai hian, Pakistan batsman ho pawh, bat a lo vuak chat chat chu sawi loh, an glove leh an ngalkawr te chu a tisa him nan a ṭha tawk em tih a khat tawkin an test kha a ni ta ber mai awm e.
Kut vung ber bur, ke vung ber bur
Pakistan batsman ṭhenkhat kha chu, inkhelh a zawh meuh kha chuan, an kut leh ke vel vung leh hliam zual tur ven nan, vur vawta inchiah kha an mamawh ve nual hlawm ang. Indian bowlers ten, "Kan batting department chet fuh lo ni nimahse, keini lam department hi chan chhuak turin kan ṭha tawk," ti ni awm takin an khawsa.
Pakistan batters ṭhenkhat erawh, an han chhui kir anga, "Engvangin nge at ka chhuah thut le?" tia inchhiar ngawih ngawih pahnih thum chu an awm ngei bawk ang. Mitthi tho leh Rishabh Pant-a glove work pawimawh zia a lang a, India fielder-te an lo world class tawh zia America ramah an pholang. Hmakhawsang aṭang hun pawimawh irhfiak ching Pakistan hian, irhfiak thut hi an la sim thei lo tih a chiang tel bawk.
Blockbuster
Runs tam tak, 6 leh 4 surna inkhel kher hi blockbuster ni tur hian a lo ṭul chuang lo tih tun Pathianni zan khan a chiang. ICC-in lei rem rah a tum vena, infiamna khawvel Headquarter US an ngei mai, cricket ngei chuan India leh Pakistan blockbuster hmangin chi nung a theh ngei a ni, i ti phawt mai ang aw.