Euro 2024: England tan kawng a inhawng em?

Football ram ropuia inchhal an ni a, an national team hlapui atan pawha "Football's Coming Home" (Football-in run a lawi dawn e...) tih hmang ngam ngat an ni a, football an inti neitu hle.

League aṭanga teh tur lah ni se, khawvel footballer zawng zawngin khelh an châkna English Premier League neitu an ni a, football mai ni lo, infiamna khawvelah EPL aia ngaihven hlawh zawk a awm kher lo ang.

Mahse, chutiang taka football inti neitu leh âtchilhtu, ram ropui tak ni mah se, England-in international level-ah hlawhtlinna an chang hleithei meuh lo a, kum 1966-a World Cup nomawi an chawi kha tun thlenga major trophy chhuan tur an neih chu a la ni ta reng.

Golden Generation hming lem an pek meuh pawh khan nomawi chawi loin an liamsan a, tun hi khami hnua player an neih hrawl leh ber a ni ang em aw, tih theih hial a ni - i awih loh chuan England squad-a tel phak lote zawh theih an ni!

Hello Group C

England hian June 16, Pathianni zanah an match hmasa ber an khel dawn a, Serbia an hmachhawn ang. Three Lions hi group C-ah awmin, an awmpuite hi Serbia bakah Denmark leh Slovenia te an ni.

Team en vang vangin England an vannei tiin a sawi theih a, European football-a team langsar tak an awmpui lem lo. Chutihrual chuan an awmpuite hi zuam sual theih tak vek an ni a, Three Lions tan round of 16 lut turin fimkhur a ṭul dawn.

Group C team zingah Denmark chu European champion ni tawh awmchhun an ni a, FIFA Confederations Cup-ah an champion tawh bawk. Chutihrual chuan Euro an champion hi 1992 daih kha a ni ve tawh tho a, uanpui atan chuan a rei ta deuh.

Slovenia hian World Cup vawi hnih leh Euro vawi khat khel tawhin group stage an la paltlang lo ve ve a, Serbia hi an ram inlak hran hnuah World Cup vawi thum khelin, group stage-ah vek an tawp a, Euro phei chu Serbia hming chawia an vawi khat khelhna tur a ni.

Mahse maw...

Three Lions-in an hmachhawn hmasak ber tur hi Serbia an ni a, Euro an inlan vawi khatna tur ni mah se, an tawh a khirh dawn - Euro inbuatsaih nana an friendly match hnuhnung bera Iceland ngam lotu England tan chetsual theihna an ni.

Serbia hi captain Dusan Tadic hoin an inlan dawn a, Fenerbahce forward hi kum 35 ni tawh mah se a la rintlakzia hrechiangtu chu Turkish club an ni. Tlarhma hi Serbia chakna ber tiin a sawi theih a, ven uluk an ṭul dawn.

Al Hilal striker Aleksandar Mitrovic hian Saudi Arabia lam pan tawh mah se, a thiam ngaiin a la thiam reng a, ani bakah hian Juventus striker Dusan Vlahovic leh AC Milan striker Luka Jovic te an la awm a, ṭha tak an ni!

First choice goalkeeper Predrag Rajkovic hi Real Mallorca tana khel mek a ni a, a thachhang dawltu tur hi Chelsea keeper Dorde Petrovic a ni. A tawi zawnga sawi chuan he team hi an ṭha takzet a, group stage piah lam an mitthla ang.

Denmark ber hi

Kum 2020 aṭang khan Kasper Hjulmand-a'n Denmark a enkawl tawh a, ani kaihhruaina hnuaiah hian Euro 2020-ah khan pathumna hial an ni - Hjulmand-a'n Denmark a hrechiang lehzual tawh a, tun inelnaah semifinal aia sang an beisei dawn.

He team hian tlarhmaah Manchester United striker Rasmus Hojlund an nei a, United-ah beisei la phak rih lo mah se, a theihna neihsanzia hmutu tan a ṭhatna phatna tur a awm lo - Anderlecht forward Kasper Dolberg leh RB Leipzig forward Yussuf Poulsen an la awm cheu bawk.

Manchester United midfielder Christian Eriksen hian tun hma a pha lo ta deuh niin lang mah se, en kan mai atan chuan a la uiawm a, Tottenham Hotspur midfielder Pierre-Emile Højbjerg leh Sevilla midfielder Thomas Delaney te pawh innghahna tlak an la ni.

Denmark tan hian Leicester City-a hming chher em em Kasper Schmeichel chu si ban nghaktu a la ni reng a, tlarhnungah captain tawnhriat nei ṭha Simon Kjær-a'n a la ho thei bawk.

Slovenia maw?

Group C-a team nêm ber thlang dawn ila, a tam zawkin Slovenia kan thlang hial mai thei - mahse, he team-ah hian Atletico Madrid keeper chhuanvawr Jan Oblak chu an captain a ni tih theihnghilh lo la!

Slovenia hian tlarhnungah player langsar tia chhal tur nei lo mah se, kum 2024-a match nga an khelh tawhah goal li chiah an la chhuah a, an tlarhnung an nghet ṭha tawk tih a lang chiang.

Panathinaikos winger Benjamin Verbic hi goal nawr kawngah a thawhhlawk ṭhin viau a, midfield-ah Serie A lama a hun tam zawk hmangtu Jasmin Kurtic che vel pawh a hmuhnawm ṭhin - kum 35 niin, a kum erawh a tam ve deuh ta.

Juventus player, wing back-a chhawr theih Filip Kostic hi theihnghilh loh a ṭha a, RB Leipzig striker Benjamin Šeško hian season hman zawh takah khan goal 18 ngawt a khung avangin hlauh a fuh ang!

A ṭha ber chu

England elpuite ṭhatzia kan sawi rualin Three Lions hi an ṭha ber tih loh rual an ni lo a, tun Euro-a an hruai tak loh Jordan Henderson, Jack Grealish, James Maddison, Kalvin Phillips, Marcus Rashford, Jadon Sancho, Callum Wilson leh Dominic Solanke te hi en ila, Euro-a team ṭha tak dinna tham an ni!

Chu chuan England team ṭhat tawkzia a pholang a, a pawimawh ber erawh coach Gareth Southgate hi he team ṭha tak kaihruai tur hian a ṭha tawk ang em, tih chu a ni - World Cup 2018 semifinal, 2022 quarterfinal leh Euro 2020 final a hruai thleng tih erawh theihnghilh lo la.

Tlarhmaah Harry Kane chu innghahna a ni leh dawn a, a thachhang dawl turin Premier League-a season duhawm tak hmangtu Ollie Watkins a awm - Jude Bellingham, Phil Foden, Cole Palmer, Bukayo Saka, Declan Rice, Trent Alexander-Arnold leh Kyle Walker te kawltu team hi an chhe thei lo hrim hrim.

Mahse, England hian kum 2024-ah match li khelin, vawi khat chiah chak an nei a, Wembley-ah Brazil (1-0), Belgium (2-2) leh Icelnad (1-0) lakah an chak zo lo a, St James' Park-a 3-0 a Bosnia-Herzegovina an hneh chu chhuan tur an neih a ni - Euro ṭan hmain insiamrem an mamawh e.