Argentina chakna Di Maria

Copa America champion lai Argentina chuan an nomawi humhim tumin inbuatsaihna an nei mek, nimin zing khan Ecuador chu friendly match khelh puiin Angel di Maria goal khat hmangin 1-0 in an hneh.

World champion nih puitu Lionel Scaloni-a'n a player neih ṭhate a chhawr a, chutihrualin captain Lionel Messi erawh bench lamah a la dah rih thung - Di Maria, Julian Alvarez leh Lautaro Martínez ten inkhel bul an ṭan.

Chawlhlawk hma deuhin Di Maria hian box sir lam aṭangin goal awmchhun a khung, a tlan chak bakah goal hmaah a chiai lo a, hmun ruak zimte awm chu hmu fuhin a khung chat a ni.

Inter Miami forward Messi pawh bench aṭanga luhtir niin, coach Scaloni-a'n a lo sawi lawk tawh ang ngeiin a dam ṭha chho leh tawh a, inelna tak an hmachhawn hunah chuan minute 90 khel turin a inpeih a rinawm.

Argentina hian Copa America inbuatsaihna hnuhnung atan June 15, Inrinni zing dar 5:30 hian Guatemala chu FedExField, Maryland-ah friendly match an khelhpui leh dawn a ni.

World champion hian Copa America an match hmasa ber chu June 21, Zirtawpni zingah Canada nen an khel ang. Group A-ah Argentina leh Canada bakah Chile leh Peru te an awm bawk.

Argentina Squad:

Goalkeepers: Franco Armani (River Plate), Gerónimo Rulli (Ajax), Emiliano Martínez (Aston Villa).

Defenders: Gonzalo Montiel (Nottingham Forest), Leonardo Balerdi (Marseille), Germán Pezzella (Real Betis), Nicolás Otamendi (Benfica), Cristian Romero (Tottenham), Nicolás Tagliafico (Lyon), Lucas Martínez Quarta (Fiorentina), Lisandro Martínez (Manchester United), Nahuel Molina (Atlético Madrid), Marcos Acuña (Sevilla), Valentín Barco (Brighton & Hove Albion).

Midfielders: Guido Rodríguez (Real Betis), Leandro Paredes (AS Roma), Alexis Mac Allister (Liverpool), Rodrigo de Paul (Atlético Madrid), Exequiel Palacios (Bayer Leverkusen), Enzo Fernández (Chelsea), Giovani Lo Celso (Tottenham), Ángel Di María (Benfica), Valentín Carboni (Monza).

Forwards: Lionel Messi (Inter Miami), Ángel Correa (Atlético Madrid), Alejandro Garnacho (Manchester United), Nicolas González (Fiorentina), Lautaro Martínez (Internazionale), Julián Álvarez (Manchester City).